Millimizin hücumçusu Ramil Şeydayevin klubunu dəyişmək istədiyini yazmışdıq.

Yanvarın 11-də mövzu ilə bağlı yayılan xəbər əslində bu məsələyə müəyyən mənada işıq saldı. Belə ki, Türkiyənin 1-ci liqa təmsilçisi "Kocaelispor"un prezidenti Əngin Koyun jurnalistlərə açıqlamasında Ramillə anlaşdıqların, onun sabah (yanvarın 12-də - red.) Türkiyədə olacağını və klubla ilyarımlıq müqavilə imzalayacağını dedi. Hətta həmkarlarımızın araşdırmalarına görə, hücumçu 550 min avro qazanacaq. Belədə məsələnin bütünlüklə həll olunduğunu gözləmək olardı. Lakin artıq yanvarın 14-dü, “Kocaelispor” Ramilin transferi ilə bağlı xəbəri rəsmən açıqlamayıb. Görəsən, nə baş verib?

"Football-plus.az" olaraq, mövzunu araşdırmağı lazım bildik. Öncə Şeydayevin sosial şəbəkə hesablarına göz gəzdirdik. Futbolçunun dünən axşam saatlarında paylaşdığı şəkillərdən məlum oldu ki, hələ də Taylanddadı. Üstəlik orda azərbaycanlı peşəkar kikboksçu Rolan Quliyevlə görüşüb.

Axtardığımızı isə Türkiyə mətbuatında tapdıq. "Özgür Kocaeli" nəşrinin yaydığı məlumata görə, Ramil "Kocaelispor" rəhbərliyi ilə əlaqə saxlayaraq yanvarın 16-na qədər vaxt istəyib. Yəni futbolçu əvvəlcə klubun təklifiylə qeyd-şərtsiz razılaşsa da, indi tərəddüd içindədi və qərarının doğru olub-olmadığını düşünür. Razı olsa, iki gün sonra Türkiyəyə gəlib müqaviləyə imza atacaq.

Ramilin mövqeyinin qəfil dəyişməsi səbəbsiz deyil. Ola bilər ki, Ramil başqa təklifləri də dəyərləndirmək istəyir. Axı Rusiya premyer-liqasının turnir cədvəlinin 7-ci pilləsində qərarlaşan "Rubin" də onun xidmətində maraqlıdı. İkinci səbəb isə Türkiyə Futbol Federasiyasının məlum qərarı ola bilər. Xatırladaq ki, qonşu ölkənin futbol qurumu azərbaycanlı futbolçuların gələn mövsümdən legioner sayılacağı haqda qərar qəbul edib. Belədə Ramil “Kocaelispor” superliqaya vəsiqə qazanacağı təqdirdə legioner statusu ilə oynayacaq ki, bu da yetərincə çətin görünür.

İndi bizə gözləmək qalır. Görəsən, yığma üzvü bezdiyi Tayland ekzotikasından canını qurtarmaq üçün hansı yolu seçəcək?

KƏNAN BAHADIR