“Kəpəz” Gəncə şəhər stadionundakı təmir-bərpa işləriylə bağlı hələ də ev oyunlarını Tovuzda keçirir.

Şənbə günü həmin meydanda izlədiyimiz “Turan Tovuz” – “Sumqayıt” matçından fərqli bu dəfə tribunalar dolu deyildi. Halbuki rəqib yetərincə iddialı “Sabah” idi, üstəlik yeni baş məşqçi Adil Şükürov da gəncəli azarkeşlər önündə debüt edəcəkdi.

Topu oyuna “tələbələr” daxil etsə də, “sarı-göylər” qısa zamanda təşəbbüsü ələ alıb ilk hücum qurdu. Qonaqların müdafiəçiləri kobud səhvə yol verdiyindən Martins qapıya zərbə zərbə endirməyə macal tapdı. Lakin Nicat möhtəşəm seyvlə hesabın açılmasına mane oldu. Bundan sonra, Masazır təmsilçisi fəallaşdı. Maraqlıdı ki, qonaqların ilk iki hücumu 2 qolla nəticələndi. Öncə Anatoli Elvinin ötürməsindən sonra topu qapıdan keçirdi, ardından Namik fərqləndi. Düzdü, yarımmüdafiəçi bunu asanlıqla bacarmadı. Çünki həm qapıçı, həm də Yeqor var qüvvəsiylə futbolçunun qarşısını almaq istəyirdi. Buna baxmayaraq, müdaxilələr işə yaramadı. İlk dəqiqələrdə “Kəpəz”in müdafiə xətti diqqətsizliyiylə seçilirdi ki, “Sabah” bundan maksimum istifadə etmək istəyirdi. Əslində bu ərəfədə matçı izləyənlər ev sahiblərinin böyükhesablı məğlubiyyətini proqnozlaşdıra bilərdi. Lakin belə olmadı. 15-ci dəqiqəyə qədər iki qol buraxan “Kəpəz” ardından döyüşkən oyun göstərməyə başladı. Hətta gəncəlilər bir neçə epizodda qol vurmağa yaxın idi. Amma Onanuqa, Papunaşvili, Kvirkviya və Niane daha dəqiq zərbələr vurmaq əvəzinə şansları sağa-sola xərclədi. Və “Sabah” qollardan sonra bir dəfə belə rəqibi qorxuda bilmədi. Qonaqlar qapı önünə qədər gəlməyə belə çətinlik çəkirdi. Qeyd edilənləri ikinci hissəyə də aid etmək mümkündü. Masazırlılar sözün əsl mənasında müdafiəyə çəkilərək “Kəpəz”in hücum cəhdlərini zərərsizləşdirməklə məşğul idi. Matçda başqa qol olmadı. Nəticədə “Kəpəz” autsayder mövqeyindən qurtula bilmədisə, “Sabah” mövsümdə 5-ci qələbəsini qazandı. Bakılıların qış fasiləsinə qədər olan hədəfi bütün oyunlarda qələbə qazanmaqla ilk “5-liy”ə düşməkdi.

Gözdən qaçmadı
* Murad Musayev komandasının hesabda öndə olmasına baxmayaraq, emosional davranış və kobud müdaxilələr ilə yadda qaldı. Rauf Cabbarov 37-ci dəqiqədə rusiyalı mütəxəssisi sarı vərəqə göstərərək sakitləşdirdi.
* PFL-in saytında yer alan protokolda tamaşaçı sayı 500 göstərilsə də, tribunalarda təxminən 250 azarkeş var idi.

KƏNAN BAHADIR