Elita təmsilçisi “Səbail” 1-ci liqanın iddialılarından “Şamaxı” ilə oyuna qələbə əzmi ilə çıxmışdı.

İlk 15 dəqiqə qarşılıqlı hücumlarla yadda qaldı. Ramiz Məmmədovun komandası 9-cu dəqiqədə təhlükəli vəziyyət yaratsa da, “dənizçilər”in müfafiəçiləri sayıqlığı itirmədi. 22-ci dəqiqədə Adil rəqibin cərimə meydançası daxilində hava ötürməsini başıyla ram edərkən top Elşadın əlinə dəydi. Tural Qurbanov penalti qərarı verdi. Topa yaxınlaşan Amil zərbəni səhvsiz yerinə yetirdi. Qoldan sonra qonaqlar bir qədər fəallaşsa da, iş real qol vəziyyətlərinə gedib çıxmırdı.

33-cü dəqiqədə Luqasi fərqi artırmaq istəsə də, qapıçı və müdafiəçilər ona imkan vermədi. Hissənin sonunda rəqibi əks-hücumda yaxalayan “dənizçilər” fərqi artırdı. Talehin ötürməsini qəbul edən Amil iki oyunçunun arasından keçərək topu tora qovuşdurdu.
İkinci yarıda əsas heyət oyunçularını meydana buraxan Diniyev çox keçmədən əvəzləmələrinin bəhrəsini gördü. Zeynəddinin yerinə meydana çıxan Pedro 50-ci dəqiqədə baxımlı qola imza atdı. Rüfət 56-cı dəqiqədə hesabı 4:0 edəndən sonra “şirlər”in düşərgəsində ruh düşkünlüyü bir qədər də artdı. Bundan sonra hakimin final fitinə qədər qonaqlar nə bir təhlükəli əks-hücuma çıxdı, nə də ki, qapıya effektli zərbə vurdu. 65-ci dəqiqədə qapıçı ilə təkbətək çıxan Amil het-trik etsə də, VAR hakimləri ofsayd qeydə aldı. 74-cü dəqiqədə Rüfət qapını dəqiq nişan ala bilmədi. Amma 6 dəqiqə sonra özünün 2-ci, komandasının 5-ci qoluna imza atdı. Son nöqtə 90+2-ci dəqiqədə qoyuldu. Mehremiç cərimə zərbəsindən sonra qapı dirəyindən qayıdan topu başla boş qapıdan keçirdi. Beləliklə, oyun “Səbail”in böyükhesablı qələbəsi ilə yekunlaşdı. “Karvan”, “İrəvan” və “İmişli”nin ardından 1-ci liqanın daha bir komandası – “Şamaxı” da kubok uğrunda mübarizədən çəkildi.

Gözdən qaçmadı
* Azarkeş dəstəyi yox səviyyəsində idi.
* Ramiz Məmmədov futbolçularından birinə “25-26 yaşın var, onun nəyindən qorxursan?” dedi.

MİRKAMAL KAZIMZADƏ