Birinci liqa təmsilçisi “İrəvan” yenə gündəmdədi. Mövsümə böyük iddia ilə başlayan, ancaq sonradan ciddi maliyyə problemi ilə üzləşən klubda sular heç durulmaq bilmir.

Baş məşqçi Nazim Süleymanovun “İmişli”yə məğlubiyyətdən sonra dediyi bu sözlər diqqətimizi çəkdi:

Klubun hədəfinin dəyişməsi, meydana buraxmağa oyunçu tapmaması o deməkdi ki, maliyyə durumu bir qədər də pisləşib. Daha dəqiqi, “İrəvan” yaranandan bəri onun yanında olan, Qərbi Azərbaycan İcmasının nüfuzlu şəxslərindən olan Zülfüqar Kazımov da klub prezidenti Zahid Niyazəliyevlə fikir ayrılıqları üzündən yaxasını kənara çəkib. Biz dünən bu inciklik məqamını aydınlaşdırmaq üçün Zülfüqar bəylə danışmağa çalışdıq. Bizdə olan mobil nömrə vasitəsi ilə əlaqə saxlasaq da, cavab vermədi. Belədə klubun sabiq vitse-prezidenti Alı Alıyevlə danışdıq. Bəzi suallarımıza cavab tapdıq.

- Əldə etdiyimiz bilgiyə görə, Zülfüqar Kazımov da klubdan ayrılıb. Bu xəbər doğrudumu?
- Bəli, doğrudu.

- Bəs onun kluba maliyyə dəstəyi var idi, yoxsa, sadəcə, ad kimi qalmışdı?
- Zülfüqar müəllim klubun əsas maliyyə mənbəyi idi. O, həm inventar alırdı, həm də toplanışlar təşkil edirdi, bir sözlə, klub üçün hər şeyi edirdi.

- Zahid Niyazəliyevlə yola getmədiyinə görə bu addımı atıb?
- Yəqin ki, elədi. Çünki Zahid yalnız özünü düşünən, loru dildə desək, fırıldaqçı bir adamdı.

- Nazim Süleymanov deyir ki, artıq klubun hədəfləri dəyişib. Onda belə anlaşılır ki, klub, sadəcə, var olmaq xətrinə liqada olacaq?
- Hazırda klubun maliyyəsi, sadəcə, AFFA-dan ayrılan illik 300 min manatla təmin olunur. Həmin məbləğlə də nə bacarırlarsa, odu.
Xatırladaq ki, 13 turdan sonra 20 xal toplayan komanda turnir cədvəlinin 6-cı pilləsində qərarlaşıb.

KAMAL SƏFƏR