1-ci liqanın favoritlərindən “İrəvan”ın problemləri bitmək bilmir.

Oktyabrın 18-də “İmişli” ilə səfər oyununa çıxmayan komandanın buna görə texniki məğlubiyyət alacağı şübhə doğurmur. Rəhbərlik heç cür futbolçuların maaşını ödəyə bilmir. Hadisələri diqqətlə izlədikdə görürük ki, “İrəvan” oyunçularına yetərincə yüksək maaş verir. Klubun normal büdcəsi yox idisə, bu oyunçularla niyə ağlasığmaz pullar vəd edilib?

Klub rəhbərliyi ilə əlaqə saxlamaq mümkün olmasa da, “İrəvan” formalaşanda komandanın baş məşqçisi olan Elbrus Məmmədovun bizə verdiyi açıqlamadan aydın olur ki, futbolçularla maaş barədə danışıqlarda Zülfüqar Kazımovla Zahid Niyazəliyev iştirak edib. İndi isə belə çıxır ki, rəhbərliyin futbolçular vəd etdiyi məbləği verməyə imkanı yoxdu, dövlətin ayırdığı 300 min manat da yetmir. Bir sözlə, klub rəhbərliyi futbolçuları aldadıb.

Geniş yayılan bir fikir də var ki, “İrəvan” Qərbi Azərbaycan İcmasının layihəsidi. Klubun təqdimatı zamanı prezident Zahid Niyazəliyev də qurumun rəhbəri Əziz Ələkbərliyə mənəvi dəstəyə görə təşəkkür edib.

Bəs Qərbi Azərbaycan İcması kluba dəstəkdisə, nədən son yaşananlara müdaxilə etmir? Təbii ki, icma “İrəvan”ı maliyyələşdirə bilməz. Bunun üçün hüquqi əsas yoxdu. Ümumiyyətlə, klub “İrəvan” adını daşıyırsa, icma bu məsələlərə müdaxil etməlidi. Çünki rəhbərliyin dediyi kimi, bu komanda bütün Qərbi Azərbaycanı təmsil edir. Son biabırçı hadisələr icmanın fəaliyyətinə kölgə salır. Qurumun mətbuat katibi Ülviyyə Zülfüqar bizə yaxın günlərdə rəsmi açıqlama verəcəklərini bildirdi.

Hə, bu yaxın günlər məsələsi... “İrəvan” oktyabrın 26-da evdə “Şamaxı” ilə qarşılaşmalıdı. Zahid bəyin vəziyyətdən çıxmaq üçün hələ 5 gün vaxtı var. Yox, komanda bu oyuna da çıxmasa, növbəti texniki məğlubiyyət və əlvida, “İrəvan”...

İLKİN SULTANLI