“İrəvan”da futbolçulara yalan vədləri kim verib? - AÇIQLAMA
“İrəvan”da başverənlər ölkə gündəmini zəbt edib. Yaşanan hadisələri aşağı-yuxarı bilirsiz. Futbolçular maaşlarını ala bilmədikləri üçün həm məşqə, həm də oyuna çıxmır. Klub rəhbərliyi çalışır ki, oyunçuları müxtəlif yollarla razı salsın. Amma alınmır.
Hadisələri diqqətlə izlədikdə görürük ki, “İrəvan” oyunçularına yetərincə yüksək maaş verir. Klubun normal büdcəsi yox idisə, bu oyunçularla nə üçün ağlasığmaz pullar söz verilib? Klub rəhbərliyi ilə əlaqə saxlamaq mümkün olmadı. Amma “İrəvan” formalaşanda komandanın baş məşqçisi olan Elbrus Məmmədova müraciət etdik. Təcrübəli mütəxəssis “Football-plus.az”a bunları söylədi:
“Əvvəlcə klubda başverənlərlə bağlı danışmaq istəyirəm. Mən “İrəvan”dan ayrılmamışam. Sadəcə, gördüm ki, futbolçuların və məşqçilərin maaşı verilmir. Adamların gözünə baxa bilmirdim. Sonra da Nazim Süleymanovu məşqçi təyin etdilər. Maaş verilməyəndə futbolçular belə etməliydi. Düzdü, oyunçuların çoxunu komandaya mən dəvət etmişəm. Yəni rəhbərliyə demişəm ki, bunlara ehtiyacım var. Lakin mən onlarla maaş söhbəti etməmişəm. Mənə vədləri Zülfüqar Kazımov verirdi. Hər şeyin yaxşı olduğuna inandırmışdı. Ağsaqqala güvənmişdim. Axırda dedi ki, mən elə söz deməmişəm. Mən heç Zahid Niyazəliyevi futbola yaxın adam saymıram. Həmin şəxs anormaldı. Zahidlə bir yola çıxmaq günahdı. Yenə deyirəm, maaş danışmamışam. Demişəm ki, bu oyunçuları komandaya dəvət etmək lazımdı. Futbolçularla maaş barədə danışıqda Zülfüqar Kazımov, Zahid Niyazəliyev olub. Mən deməmişəm ki, bu futbolçuya min və ya 3 min manat ver. Danışığı özləri edib. Sonradan öyrənəndə ki, filankəs bu qədər maaş alır, sevinmişəm. Çünki istəmişəm ki, futbolçum üçün yaxşı şərait qurulsun”.
İLKİN SULTANLI
