Təbii ki, bu oyun formal xarakter daşıyırdı. “Qarabağ” Murad Musayevin istefasıyla nəticələnən oyunda bu cütün taleyini həll etmişdi.

“Sabah”ın üzərinə düşən iş, sadəcə, qisas almaq idi ki, “tələbələr” bunu müəyyən mənada bacardılar.
Düzü, ilk dəqiqələrdə oyunun hansı macrəda keçəcəyini təyin etmək çətin idi. İşimizi Da Silvanın 5-ci dəqiqədə uzaqdan zərbəylə vurduğu möhtəşəm qol asanlaşdırdı. Braziliyalı yarımmüdafiəçi topu elə nöqtəyə göndərdi ki, Lunyovun seyr etməkdən başqa yolu yox idi. Qonaqlar sağ cinahda daha fəal idi ki, bunu da Elvin Cəfərquliyevin zəif çıxışıyla bağlamaq lazımdı. Nəticədə növbəti qol da qaçılmaz oldu. Marqaritanın durumu Parrisin ötürməsindən faydalanmaq üçün münbit idi ki, niderlandlı yarımmüdafiəçi fürsəti əldən vermədi. “Tələbələr” 27-ci dəqiqədə Lunyovu növbəti dəfə məyus etdi – 2:0. “Qarabağ” bir qədər həyəcanlansa da, tezliklə Keyta həm Qurban Qurbanovun, həm də azarkeşlərin “ürəyinə su səpdi”. Təkbaşına rəqiblərinin başını gicəlləndirən fransalı fərqi azaltdı. Növbəti təhlükəli vəziyyəti də ağdamlılar yaratdı, amma Silvanın başla zərbəsi qapının üzərindən keçdi.

İlk yarının sonlarında “Qarabağ” meydanda söz sahibi idisə, ikinci yarı fərqli başladı. “Sabah” hücumların kəsərini artırdı. 58-ci dəqiqədə Parrisin üç müdafəçinin təzyiqi altında ara ötürməsindən sonra Belfodil topu tora qovuşdurdu – 1:3. Lakin Masazır təmsilçisi yenə hesabı qoruya bilmədi. 61-ci dəqiqədə hücuma qoşulan Abbas Diakabini vaxtında gördü. Sonuncu sərrast zərbəylə fərqi minimuma endirdi. Qonaqların qolkiperi ardından Keyta ilə Cicanın zərbələrini dəf etməli oldu. 67-ci dəqiqədə Toral qol vurmağa yaxın olan Amini kobud qayda pozuntusuyla dayandırdı. Allahverdiyev dərhal penalti nöqtəsini göstərdi ki, Belfodil dəqiq zərbəylə həm özünün, həm də komandasının növbəti qoluna imza atdı. “Sabah” yenə qolun sevincini doyunca yaşamadı. Toralın qapı önünə ötürməsi zamanı təhlükəni sovuşdurmaq istəyən Hadudi diqqətsizlik üzündən avtoqola səbəbkar oldu. Bəlkə də “Qarabağ” məğlubiyyətdən qaça bilərdi. Sadəcə, 76-cı dəqiqədə Tilə qarşı hədsiz kobud oynayan Almeyda komandasını azlıqda qoydu. Təbii ki, “Sabah” fərqi artırmaq istəyirdi. Amma “Qarabağ” buna imkan vermədi. 83-cü dəqiqədə Tellurun zərbəsi dirəkdən döndü. Ümumiyyətlə, son saniyələrə qədər gərgin mübarizənin şahidi olduq. Hesab isə dəyişmədi.

Gözdən qaçmadı
* Oyun bir dəqiqə tez başladı. Həmçinin PFL-in “yutub” kanalı canlı yayına 20.03-də qoşuldu. Qurumdan aldığımız məlumata görə, gecikmənin səbəbi texniki problem imiş.
* Qurban Qurbanov 1-ci hissədə matçda tez-tez yaranan fasiləyə görə baş hakimə əl-qol hərəkətləriylə etiraz etdi.
* İqor Ponomaryov buraxılan hər qoldan sonra aqressiv davranır, futbolçulara qışqırırdı.
* “Soldati di Sabah” “Son nəfəsimizə, son nəfərimizə qədər” sözləri yazılmış pankart açmışdı. Onlar “Şəhidlər ölməz, vətən bölünməz” şüarını “Qarabağ Ordu” və “İmarət Tayfa”dan fərqli 44-cü yox, 45-ci dəqiqədə səsləndirdi.

Yeri gəlmişkən...
“Qarabağ” ölkə kubokunda ilk dəfə 4 qol buraxdı. Ağdamlılar çempionat oyununda isə sonuncu dəfə belə aqibətlə 2012-ci il aprelin 22-də üzləşib. Onlar həmin gün “Bakı”ya 2:4 uduzub. Həmin oyunun üstündən 4309 gün keçmişdi.

KƏNAN BAHADIR