Yığma fasiləsindən sonra keçirilən ilk oyun üçün hər komandanın özünə görə hədəfi var idi.

"Football-plus.az" xəbər verir ki, mövsümü qeyri-sabit keçirən “Sabah” məhz əsas rəqiblərindən biri ilə dueldə qələbə yürüşünün əsasını qoymaq, “Qarabağ” da Norveçə yaxşı əhval-ruhiyyədə yollanmaq istəyirdi.

Tərəflər oyuna ehtiyatlı başladı. Qapıya ilk zərbə qonaqlardan gəldi. Amma Zubir hədəfə düşmədi. Meydan sahibləri buna İsayevin qeyri-dəqiq zərbəsiylə cavab verdi. 18-ci dəqiqədə Nəriman uzun reyddən sonra qapıçını da keçsə də, boş çərçivəyə düşə bilmədi. 30-cu dəqiqədə Çaklanın uzun ötürməsindən sonra topu qəbul edən Sekidika sürətlə cərimə meydançasına daxil oldu, Lunyovu da keçdikdən sonra qapıçı ona qarşı kobud oynadı. Referi dərhal “nöqtə”ni göstərdi. Topa yaxınlaşan Apeh Lunyovu aldada bilsə də, zərbəni dirəyə vurdu. Bir qədər sonra Letiçin qapı önünə asmasını qəbul edən Apeh boş qapıya düşə bilmədi. 45-ci dəqiqədə Benzya Allah bilir neçənci dəfə “Sabah”ın qapısına zərbə vurdu, amma Nicat əla seyvlə yadda qaldı.

2-ci yarıda da oyunun sürətli keçəcəyi gözlənilən idi. 54-cü dəqiqədə “Sabah” hesabı bərabərləşdirməyə çox yaxın oldu. Sadəcə, Ələskərovun qapı önünə ötürməsinə yüngülcə toxunmaq lazım idi ki, Sekidika bunu bacarmadı. Və “vurmayana vurarlar” prinsipi işə düşdü. Elvin topu cinahdan cərimə meydançasına göndərmək istəyərkən Hadudi əllə oynadı. VAR-dan gələn müdaxilədən sonra referi penalti təyin etdi. Apehdən fərqli Toral dəqiq oldu. Şokdan ayılmayan "bayquşlar" 61-cı dəqiqədə bir daha cəzalandı. Zubirin ötürməsindən sonra Nəriman fərqi artırdı. 64-cü dəqiqədə isə "Qarabağ"ın müdafiəçiləri təhlükəni uzaqlaşdırmaq istəyərkən top Alekseyə tərəf sıçradı, kapitan başla Sekidikaya ötürmə verdi, o da hesab arasında fərqi azaltdı. Bundan sonra "Sabah" bərabərlik qolu üçün irəli atıldı. Parris iki dəfə qapını yoxlasa da, biri qeyri-dəqiq alındı, digərində qapıçı topu tutdu. Meydana sonradan çıxan Belfodilin zərbəsi az fərqlə qapının üstündən keçdi. Gərgin və maraqlı mübarizə şəraitində keçən oyundan “Qarabağ” qalib ayrıldı.

Gözdən qaçmadı
* Oyunun startına sayılı dəqiqələr qaldığı vaxtda Qurban Qurbanov meydana çıxdı. Bu zaman masazırlı azarkeşlər onu alqışlamadı, adını səsləndirdi.
* Qonaqlar Masazıra iki azarkeş qrupuyla gəlmişdi - "İmarət Tayfa" və "Ordu is here" plakatlarını qaldırmışdılar.

ABDULLA İSMAYILOĞLU