Şənbə günü lider “Qarabağ” səfərdə “Kəpəz”lə qarşılaşdı.

Hər iki komanda qış fasiləsindən sonra keçirdiyi ilk oyundan qalib ayrılmışdı. Demək olar ki, müqavimətsiz irəliləyən Ağdam klubu bu oyunun da aşkar favoriti idi. Lakin nəzərə alsaq ki, Adil Şükürovun gəlişindən sonra tərəqqi edən “Kəpəz” köhnə vaxtlarına qayıtmağa iddialıdı.

Sözü uzatmadan oyuna keçək. Qaşılıqlı pressinq şəraitində davam edən oyunun ilk dəqiqələrində topa nəzarət “Qarabağ”da idi. Fəqət Şükürovun yetirmələri də əks-hücum cəhdləri ilə rəqibi diqqətli olmağa məcbur edirdi. İlk təhlükəli vəziyyət 16-cı dəqiqəyə təsadüf etdi. Veşoviçin qapı qarşısına yerlə ötürməsini Nəriman qola çevirmək istəsə də, portuqaliyalı qapıçı səhvsiz oynadı. 40-cı dəqiqədə “köhlən atlar” növbəti dəfə qola yaxın oldu. Yeni transfer İsayevin De Brunyesayağı ara ötürməsini Keyta ram edə bilmədi. İlk hissənin sonuna yaxın Bədavi cərimə meydançası kənarından qapını yoxlasa da, zərbəsi heç bir təhlükə yaratmadı.

2-ci hissəyə ağdamlılar hücumlarla başladı, lakin meydan sahibləri müdafiədə qətiyyətli oynadılar. Bu hissədə ilk təhlükəli vəziyyət 60-cı dəqiqədə yarandı. Bu dəfə Almeydanın ara ötürməsindən sonra fərqlənmək istəyən Keytanın zərbəsində azacıq dəqiqlik çatmadı. Cəmi bir dəqiqə sonra əks-hücumda qapıçıyla təkbətək qalmasına rəğmən, Cica bərbad zərbə vurdu. Nəhayət, 72-ci dəqiqədə hesab açıldı. Standart vəziyyətdən sonra Quqeaşvilinin çıxışda səhvə yol verməsini Onanuqa bağışlamadı. Onun cərimə meydançası kənarından qüvvətli zərbəylə qapıya göndərdiyi top toru silkələdi – 1:0. Qurbanovun yetirmələri qoldan sonra hücumda bir qədər də fəallaşdı. Bu fəallıq 79-cu dəqiqədə bəhrə verdi. Çempionatın bombardiri Juninyo səhnəyə çıxdı – 1:1. Xatırladaq ki, qolun ötürməsini verərkən Benzya qapıçı ilə ciddi toqquşma yaşadı. Həkimlər cəld müdaxilə etsələr də, Yassin meydanı tərk etdi. Bu üzdən “Qarabağ” son dəqiqələrdə 10 nəfərlə oynamaq məcburiyyətində qaldı. Say üstünlüyünə baxmayaraq, “Kəpəz”in bu qoldan sonra ruhdan düşdüyünü gördük. Elə bunun nəticəsində müdafiəyə çəkilən komanda qonaqların hücumlarına tab gətirmədi. 4-cü uzatma dəqiqəsində Ehtiramın cərimə meydançası daxilində Juninyoya qarşı kobudluğuna görə hakim “sarı-göylər”in qapısına penalti təyin etdi. Zərbəni dəqiq yerinə yetirən Toral komandasının qələbə qoluna imza atdı - 1:2. Oyun elə bu hesabla da yekunlaşdı.

Gözdən qaçmadı
* Martins Juniorun qüvvətli zərbəsindən sonra top təhlükəsizliyi təmin edən polis əməkdaşının üzünə tuş gəldi.
* “Qarabağ”ın iki azarkeş qrupu - “Qarabağ Ordu” və “İmarət Tayfa” komandaya dəstək verdi.

KAMAL SƏFƏR