Avropa Liqasının pley-off mərhələsində "Braqa" ilə qarşılaşacaq "Qarabağ"ın səfər proqramı bəllidi. 

Belə ki, "köhlən atlar"ı uzun və yorucu yolçuluq gözləyir. Komanda bu gün çarter reysi ilə, saat 17.00-da Portuqaliyaya yollanacaq. Kollektivin 23.50-də Portu şəhərinə eniş etməsi gözlənilir. Ağdam təmsilçisinin oyunun keçiriləcəyi Braqaya yox, Portuya getməsinin səbəbi var. Çünki bu şəhərin hava limanı beynəlxalq reysləri qəbul etmir. Qısası, "Qarabağ" Portudan Braqaya avtobusla gedəcək ki, bu da 1 saat vaxt alacaq. Beləliklə, Braqaya çatmaq üçün 7 saat 50 dəqiqə vaxt sərf olunacaq. Sabah 18.10-da Qurban Qurbanovun iştirakıyla mətbuat konfransının keçirilməsi nəzərdə tutulub. 18.30-da isə komandanın matçın keçiriləcəyi "Eştadio Munisipal de Braqa" stadionunda məşqi baş tutacaq.

Bundan başqa, heyətdə bir zədəli, bir cəzalı futbolçu var. Xatırladaq ki, Marko Veşoviç Avropa Liqasının qrup mərhələsinin son turu çərçivəsində dekabrın 14-də Bakıda keçirilən "Qarabağ" - "Həkken" (2:1) görüşündə qırmızı vərəqəyə görə meydandan qovulmuş və UEFA tərəfindən bir oyunluq cəza almışdı. Zədəli isə Kevin Medinadı. Oyunçuların komandayla birgə Portuqaliyaya yollanacağını qeyd edib, rəqibin düşərgəsinə keçid alaq.

"Braqa" bazaar günü ölkə çempionatında 21-ci turun oyununa çıxıb. Artur Jorjenin komanda lider "Sportinq"in qonağı olub və yaxşı “qonaqlıq” görüb - 0:5. “Braqa”nın bu oyunda meydana çıxan heyəti ilə tanış olun: Mateus, Borxa, Fonte (Nyakate, 84), Oliveyra, Qomes (Mendes, 63), Karvalyo (Ndur, 63), Moutinyo, Orta, Salasar (Pitsi, 84), Calo (Rocer, 90+1), Ruis.

“Braqa” hazırda 40 xalla turnir cədvəlinin dördüncüsüdü. Artur Jorje oyunsonrası mətbuat konfransında həm geridə qalan, həm də "Qarabağ"la matç haqda fikirlərini bölüşüb: “Deməyə çox şey yoxdu. Nəticə məyusedicidi. Etiraf edək ki, rəqib bizdən güclü idi. Ən yaxşı formamızdan uzağıq. Başımızı qaldırıb irəliyə baxmalıyıq. Səhvlərimizi anlamalıyıq. Təəssüflənmək üçün vaxt azdı. Avropa səyahətimizə cümə axşamı çətin oyunla davam edəcəyik. Bu da bizim üçün çox vacib görüşdü. İndi “Sportinq”lə matçı unutmalıyıq".
Bu arada "Qarabağ"ın rəqib meydanında azarkeşsiz qalıb-qalmayacağı haqda məlumat əldə etmişik. Azərbaycandan klubla birgə Portuqaliyaya demək olar ki, heç bir azarkeş yollanmayacaq. Sadəcə, öz hesabına gedəcək şəxslərin olması mümkündü. "İmarət Avropa"ya gəlincə, fanklubun bu ölkədə yaşayan üzvləri komandanı tək qoymayacaq. Onların təxminən 10-15 nəfər olması gözlənilir. Ən azı azarkeş qrupundan əldə etdiyimiz məlumatda belə qeyd olunur. “Braqa”nın “Qarabağ” azarkeşləri üçün 1500 bilet ayıracağını da xatırladaq.

Yeri gəlmişkən, "köhlən atlar"ın Bakıda keçiriləcək cavab oyunu üçün satılan biletlərin sayı bəlli olub. Satış davam edir və indiyə kimi 15 min bilet sahibinə qovuşub. Biletlərinin qiyməti isə müvafiq olaraq 5, 20, 30, 75 və 100 manat dı. Satış məntəqələrini bir daha xatırladaq: Iticket.az-ın satış məntəqələri (iticket.az-da onlayn satış), “Park Bulvar”dakı “Qarabağ” FK-nın fanşopu, Tofiq Bəhramov adına Respublika stadionunun kassaları, Heydər Əliyev Sarayının kassaları.
Sonda qeyd edək ki, bu komandalar arasındakı ilk oyun fevralın 15-də, cavab görüşü isə 22-də keçirəcək.

KƏNAN BAHADIR