Oyun hər iki tərəf üçün vacib idi. Mümkün qələbə “Molde” ilə oyun ərəfəsində “Qarabağ”ı ruhlandıracaqdısa, “Sabah” da, nəhayət, "Partizan” silləsinin təsirindən ayıldığını göstərməliydi.

"Football-plus.az" xəbər verir ki, Murad Musayevin komandası "köhlən atlar"la, sadəcə, 11-ci dəqiqəyə qədər başabaş mübarizə apardı. İlk təhlükəli vəziyyəti “Sabah” yaratsa da, Elvin “çərçivə”ni nişan almaq istəyən Volkova mane oldu.

Bundan sonra ağdamlılar intensiv hücumlar qurdu. 21-ci dəqiqədə qonaqların qapı önündəki təhlükəni sovuşdurmaq cəhdi boşa çıxdı. Zubir Yusifin toxunuşuyla önünə düşən topu tora qovuşdurdu. Lakin yan xətt hakiminin bayrağı havada idi. VAR Juninyonun çiyninin ofsaydda olduğunu əsas gətirdi və qol ləğv olundu. Yankoviçin fərqlənmək cəhdinə isə dirək mane oldu. 40-cı dəqiqədə Volkovun qapı önünə göndərdiyi topu da Bəhlul dərhal uzaqlaşdırdı.

Matçın taleyi 2-ci hissədə həll olunmalıydı. İlk yarı yekun nəticə ilə bağlı müəyyən təsəvvür yaratmışdı. "Qarabağ"ın daha dinamik oyunu qonaqları ruhdan salırdı. 54-cü dəqiqədə masazırlıların qapısı önündə növbəti təhlükə yaransa da, Andrade Toralın ötürməsindən faydalana bilmədi. Nəhayət, "köhlən atlar"ın canfəşanlığı 56-cı dəqiqədə nəticə verdi. Juninyo Benzyanın yerinə yetirdiyi künc zərbəsini qolla tamamladı - 1:0. Musayev qoldan sonra da komandasını toparlaya bilmədi. Müdafiədəki boşluqların, mənasız hücum cəhdlərinin davamını izlədik. Çakla 67-ci dəqiqədə dubl etməyə yaxın olan Juninyonun önünü kəsib yerə yıxdı. Tural Qurbanov dərhal penalti nöqtəsini göstərsə də, VAR-ın müdaxiləsiylə qərarını ləğv etdi. “Sabah”ın xal ümidini sonradan meydana çıxan Keyta boşa çıxardı. O, 87-ci dəqiqədə bir neçə müdafiəçinin arasından sıyrılaraq dəqiq zərbə ilə topu tora göndərdi – 2:0. Beləliklə, hakimin final fiti “Qarabağ”ın cari mövsümdəki 3-cü qələbəsini, “Sabah”ın isə 3-cü məğlubiyyətini rəsmiləşdirdi.

Gözdən qaçmadı
* Matça 4500 bilet satıldığı bildirilsə də, stadionda o qədər azarkeş yox idi. Maraqlıdı ki, PFL-in saytındakı protokolda da azarkeş sayı 4500 göstərilib.
* “Soldati di Sabah” fanklubu fəallıq baxımından “İmarət Tayfa” ilə “Qarabağ Ordu”nu üstələyirdisə, 2-ci hissədə tam sükuta qər1 oldu.
* “İmarət Tayfa” matç bitər-bitməz tribunaları boşaltdı. “Qarabağ” qələbəni “Qarabağ Ordu”yla birlikdə qeyd etdi. Azarkeşlər Maksimlə Juninyonun adını səsləndirdi.

KƏNAN BAHADIR