ÇL-in qrupunda oynayacağı üçün heyətini mümkün qədər gücləndirməyə çalışan “Qalatasaray” daha 2 tanınmış futbolçunun keçidini tamamlayıb.

"Football-plus.az" xəbər verir ki, maraqlıdı ki, hər iki futbolçu müqavilə ilə “Tottenhem”ə məxsus idi. Amma onlar londoluların baş məşqçisi Ange Postekoğlunun planlarına daxil deyildi. Söhbət kolumbiyalı mərkəz müdafiəçisi Devinson Sançeslə fransalı yarımmüdafiəçi Tanqi Ndombeledən gedir. Sançeslə “4+1” illik müqavilə imzalanıb. Onun illik qazancı 3,2 milyon avro təşkil edəcək. Bu keçid “Cim-Bom”a 9,5 milyon avroya başa gəlib. Bu məbləğ qarşı tərəfə 5 il ərzində hissə-hissə ödəniləcək. 27 yaşlı futbolçu hazırda Kolumbiya yığmasının düşərgəsində olduğundan “Qalatasaray”a bir müddət sonra qoşulacaq. 2016/17 mövsümündə “Ayaks”da ulduzu parlayan Sançes 2017-də 47 milyon avroya “Tottenhem”ə transfer olunmuşdu. Onun bu klubdakı karyerasını bərbad saymaq olmaz. Transfer olunduğu vaxtdan bəri heç bir mövsümdə 20-dən az oyun keçirməyib. Amma ötən mövsümdən etibarən əsas heyətdəki yerini itirmişdi. İndiyə qədər klub karyerasında 297 oyunda 13 qol, 3 məhsuldar ötürmə ilə fərqlənib. Kolumbiya yığmasında isə 54 oyuna 1 qol vurub.

Ndombele artıq “Qalatasaray”ın düşərgəsindədi. İstanbul nəhəngi bu futbolçunu pulsuz birilliyə icarəyə götürüb. 26 yaşlı oyunçunun illik qazancı 3,1 milyon avro təşkil edəcək. Müqavilədə məcburi transferlə bağlı maddə yoxdu. “Qalatasaray” Ndombelenin performansından razı qalsa, gələn yay onu daimi əsasda transfer edə biləcək. Amma bunun üçün “Tottenhem”ə 15 milyon avro ödəmək lazım gələcək. Fransa yığmasında indiyə qədər 7 oyun keçirən Ndombele “Genqam”ın yetirməsi olsa da, peşəkar karyerasına “Amyen”də başlayıb. Onun ulduzu 2017-19-cu illərdə şərəfini qoruduğu “Lion”da parlayıb. 2019-da 62 milyon avro qarşılığında “Tottenhem”ə transfer olunaraq klub tarixinin ən bahalı oyunçusuna çevrilsə də, burda ümidləri doğrulda bilmədi. Ndombele London klubunda yalnız 2,5 mövsüm keçirə bildi. O, 2021/22-nin 2-ci dövrəsini icarə əsasında “Lion”da, ötən mövsümü isə “Napoli”də keçirdi. Həm hücumameyilli, həm də müdafiəyəmeyilli yarımmüdafiəçi kimi oynamağı bacaran Ndombele ötən mövsüm Neapol təmsilçisində 40 rəsmi oyuna çıxaraq 1 qol, 2 məhsuldar ötürmə ilə fərqləndi. “Tottenhem”də isə onun göstəriciləri belə oldu: 91 rəsmi oyun, 10 qol, 9 məhsuldar ötürmə. Ndombele “sarı-qırmızılar”da “91” nömrəli formanı geyəcək. Onu da bildirək ki, bu futbolçuların transferi ilə birlikdə “Qalatasaray” tarixindəki əcnəbilərin sayı 198-ə çatdı!