Saşa Boe ilə Sedrik Bakambunun satışından 35 milyon avro qazanan “Qalatasaray”, nəhayət, ayrılan futbolçuların boşluğunu doldurmağa başlayıb.

"Football-plus.az" xəbər verir ki, ötən sayımızda İstanbul nəhənginin Karlos Vinisius və Serj Orye ilə danışıq apardığını xəbər vermişdik. Hər iki futbolçunun transferi artıq tamamlanıb. Vinisius 600 min avro qarşılığında “Fulhem”dən mövsümün sonuna qədər icarəyə götürülüb. 28 yaşlı braziliyalı forvard 4 aya 600 avro məvacib qazanacaq. O, yayda London klubunun heyətinə qayıdacaq. Vinisiusun artıq bu gün kubok matçında debüt edəcəyi gözlənilir. Orye isə 100 min avro qarşılığında “Nottingem Forest”dən transfer olunub. Onunla mövsümün sonuna qədər müqavilə imzalanıb. Təcrübəli sağ müdafiəçi bu müddətdə 600 min avro məvacib qazanacaq. Bundan başqa, ona 150 min avro imza parası da ödəniləcək. Fanatlar bu futbolçunun debütünü hələ bir müddət gözləməli olacaq. Çünki Orye hazırda Kot d`İvuar yığması ilə Afrika Millətlər Kubokunda çıxışını davam etdirir. 31 yaşlı futbolçu yığmasının kapitanıdı. Kot d`İvuar bu gün yarımfinalda Konqo DR ilə qarşılaşacaq. Yəni meydan sahibi statusunda olan bu komanda ən pis halda fevralın 10-dakı 3-cü yer uğrunda matçda iştirak edəcək. Oryenin turnirdən sonra ən azı 2-3 günlük fasilə götürəcəyini də nəzərə alsaq, böyük ehtimalla o, fevralın 15-də keçiriləcək “Sparta”ya qarşı ilk oyunu da buraxacaq.

Yeri gəlmişkən, Vinisius və Oryenin transferi ilə birlikdə “Qalatasaray” tarixindəki əcnəbi futbolçuların sayı 200-ə çatdı! İstanbul nəhəngi superliqanın başlama tarixi olan 1959-dan bəri məhz 200 legioner transfer edib. Onların arasında ən çoxu braziliyalılardı. Vinisisu klub tarixinin 24-cü braziliyalı, Orye isə 6-cı kot d`ivuarlı futbolçusu oldu. Bu arada rəhbərliyin müdafiənin sol cinahı üçün seçim edərkən tələsməyəcəyi məlum olub. Menecerlərdən kluba həmin mövqe üçün çoxlu təklif gəlir. Amma o cinahda məcburi şans qazanan Barış Alpər Yılmaz, Kaan Ayhan və Berkan Kutlu hələ ki pis təsir bağışlamır. Üstəlik Kazımcan Karataş da hələ heyətdədi. “Qalatasaray” hələ ki Rıdvan Yılmaza görə “Reyncers”ə 5 aylıq icarə üçün 500 min avro təklif edib. Həmin mövqe üçün gündəmdə olan digər futbolçular “Lion”lu Nikolas Talyafiko, “Mançester Siti”li Serxio Qomes, “Yuventus”lu Luka Pelleqrini, “Fatih Karagümrük”lü Ləvənt Mərcan və “Frayburq”lu Bərkay Yılmazdı.