Yenə də tribunalar bom-boş, səssiz-səmirsiz idi. Nə “İrəvan”ın bir azarkeş qrupunu gördük, nə də “Sektor 85” komandasını dəstəkləməyə gəldi. Daha bir tragikomediya isə media sektorunda yaşandı. Stadiona yalnız üç jurnalist gəlsə də, onlara media sektorunda yer tapılmadı. Səbəb isə mediaya ayrılmış zonada kənar şəxslərin əyləşməsi idi. Ki, buna da kimsə əncam çəkmədi.

Gözlənildiyi kimi. “Araz-Naxçıvan” oyuna bir neçə dəyişikliklə çıxmışdı. Azər Bağırov əsas heyət üzvlərindən bəzilərinə istirahət vermişdi. Nazim Süleymanovun isə ehtiyatda cəmi 5 oyunçusu (matçdan sonra dediyinə görə, onların da üçü zədəliymiş) var idi. Görüş meydan sahiblərinin üstünlüyü şəraitində başladı. Heç kim gözləmədiyi halda Qənbərov hesabı açdı. Onun zərbəsindən sonra Bukviç topu əllərinin arasından buraxdı. Naxçıvanlılar buraxılan qolun şokundan tez ayıldı. Sinenka Qurbanovun zərbəsini dəf etsə də, Nqando lazımi anda lazımi yerdə idi – 1:1. Heç bir dəqiqə keçmədən Əliyev “Araz-Naxçıvan”ı hesabda önə çıxardı. “İrəvan”ın buna cavabı gecikmədi. Əsgərov qüvvətli zərbə ilə qapı torunu silkələdi – 2:2. 6 dəqiqə sonra yenidən səhnəyə Nqando çıxdı. O, 43-cü dəqiqədə dublunu, ilk hissəyə artırılmış dəqiqələrdə isə het-trikini rəsmiləşdirdi. İkinci yarıda meydanda yalnız “Araz-Naxçıvan” var idi. 51-ci dəqiqədə Nqandonun cinah asmasını elə də ucaboy olmayan Əliyev başla qapıya göndərdi. Çox keçmədən Qurbanovun ötürməsini Kuzmanoviç qolla tamamladı. Son 10 dəqiqə isə Maşikenin benefisi ilə yadda qaldı. O, meydana sonradan çıxmasına baxmayaraq, 3 dəqiqəyə 2 qol vurmağı bacardı.

Beləliklə, daha bir elita komandası 1-ci liqa təmsilçisini mübarizədən kənarlaşdıraraq 1/4 finala yüksəldi.

Gözdən qaçmadı
* Azər Bağırov ilk yarıda Nicat Süleymanovun oyunundan məmnun qalmadı. Mütəxəssis birinci yarının ortalarında Turan Manafovu yanına çağıraraq “Turan, hazırlaş, belə oynamaqdansa, oynamasa, yaxşıdı” dedi.
* “Araz-Naxçıvan”ın 2-ci qolunda yan xətt hakimi Sevda Nuriyeva oyundankənar vəziyyət qərarı versə də, VAR qolu qeydə aldı. Həmin epizodda ofsayddan əsər-əlamət yox idi.
* “Sabah”ın aşağı yaş qrupları və məşqçiləri oyunu izləyənlər arasında idi.
* Oyundan sonra “İrəvan”ın baş məşqçisi Nazim Süleymanov “mənə heç kim mətbuat konfransı olacağını bildirməyib” desə də, sonda jurnalistlərin görüşünə gəldi.

İSMAYIL XEYRULLAYEV