Mauro İkardinin yolunu gözləyən və heyətinə hələ də səviyyəli bir hücumçu cəlb etməyən ''Qalatasaray'' nəhayət, bu yöndə ilk addımı atıb.

"Football-plus.az" xəbər verir ki, İstanbul nəhəngi təcrübəli fransızəsilli konqolu forvard Sedrik Bakambu ilə anlaşıb.

Ötən mövsümü ''Olimpiakos''da keçirən 32 yaşlı futbolçunun BƏƏ təmsilçisi ''Əl-Nəsr''ə keçəcəyi gözlənilsə də, ''Qalatasaray'' son anda onunla anlaşmağa müvəffəq olub. Bu, Bakambunun Türkiyədəki ikinci macərası olacaq. O, daha öncə 2014/15-də ''Bursaspor''un şərəfini qoruyub. Bundan başqa ''Vilyarreal'', ''Beytsin Qoyan'', ''Marsel'' və son olaraq ''Olimpiakos''da top qovub.

Yeri gəlmişkən, Bakambunun İstanbula gəlişi bir qədər yubanıb. ''Əl-Nəsr'' ilə birlikdə Niderlandda toplanışda olan futbolçu dünən ''Qalatasaray'' ın göndərdiyi xüsusi təyyarə ilə İstanbula gəlməli idi. Amma təyyarədə texniki problemlər yaranıb. Türkiyə mətbuatında yayılan şəkillərdə görünür ki, təyyarənin yanına tibbi yardım və yanğınsöndürən maşınları cəlb olunub. Ailəsi ilə birlikdə təşvişə düşən futbolçu yeni təyyarənin göndərilməsini gözləməli olub. O hələ də İstanbula gəlib çıxmayıb.

Peşəkar karyerası ərzində 400 oyuna 169 qol, 41 məhsuldar ötürmə ilə fərqlənən Bakambu ilə ikiillik müqavilə imzalanacağı gözlənilir. Yeri gəlmişkən, İstanbul nəhəngi bir oyunçu ilə yollarını ayırıb. Danimarkalı müdafiəçi Matias Ross 250 min avro qarşılığında Niderland təmsilçisi ''Neymegen''ə birillik icarəyə verilib. 21 yaşlı futbolçu ötən yay ''Olborq''dan transfer edilmişdi. Amma dizindən ağır zədə alan Ross mövsümü boşa verərək ''Cim-Bom''da cəmi 2 rəsmi oyuna çıxa bildi.

ƏLİ