“Kənan Yıldızın performansı məni həm təəccübləndirir, həm də çox sevindirir. Eləcə də Türkiyədə hər kəs onub yüksəlişini böyük məmnuniyyətlə izləyir. Türkiyə futbolu üçün yeni bir ulduz doğulub. Artıq yığma komandada da qol hesabını açıb. Hər oyunda necə istedada malik olduğunu göstərir. O, Türkiyə futbolunun gələcəyidi. Mükəmməl özəllikləri və texnikası var. Topu ələ keçirən kimi rəqiblərinin üzərinə gedərək driblinq etməkdən çəkinmir. Bu özəlliyi onu həmişə rəqiblər üçün təhlükəyə çevirir. Özü də cəmi 18 yaşı olmasına baxmayaraq, kənardan uşaq kimi görünmür. Fiziki göstəriciləri yaxşıdı və sürətlidi. Hələ inkişaf mərhələsindədi. “Yuventus”da yer almaq onun üçün əlavə üstünlükdü. “Yuventus” təkcə komanda deyil, həm də böyük bir məktəbdi. Eləcə də Alleqri dünya standartlarında bir mütəxəssisdi. İtaliyada Kənan Yıldızın Alessandro Del Pyeroya bənzədildiyini bilirəm. Biz də onun yeni Del Pyero olacağına ümid edirik. Alessandroya həmişə böyük hörmətim olub. Kənanın oyununda həqiqətən də Del Pyeroya bənzər özəlliklər var. Xüsusilə də sol cinahdan topu götürüb driblinqlərlə mərkəzə yönəlməsini nəzərdə tuturam. Amma bu özəlliyinə görə mənə daha çox “Mançester Siti”li Cek Qrilişi xatırladır. Hakan Çalhanoğluya gəlincə, birmənalı şəkildə A seriyasının ən yaxşı yarımmüdafiəçilərindən biri, bəlkə də birincisidi. Çox ağıllı futbolçudu. Qol vurur, məhsuldar ötürmə verir və komandasının oyununu təşkil edir. Nəinki İtaliyada, bütün Avropada ən yaxşı oyun qurucularından biridi. Hər gün daha da oyununu inkişaf etdirir. O mənim üçün övlad kimidi. Türkiyə yığmasına ilk dəfə mən dəvət etmişəm. İki türkiyəli futbolçunun “İnter”lə “Yuventus” arasındakı çempionluq mübarizəsində yer alması Türkiyə üçün böyük bir qürur mənbəyidi. Vinçentso Montella isə çox sevdiyim həmkarlarımdan biridi. Onun Türkiyə yığmasının başında yer alması çox yaxşı bir durumdu. Qarşıdan gələn Avropa çempionatında ona və yığma komandamıza uğurlar arzulayıram”.