10 il ''Bavariya''nın ''altyapı''sında futbol oyandıqdan sonra ötən ilə ''Yuventus''un akademiyasına keçən Kənan Yıldız Almaniya mətbuatına açıqlamalar verib.

Turinlilərin baş məşqçisi Massimiliano Alleqri bir neçə dəfə bu oyunçuya xüsusi simpatiya duyduğunu etiraf edib. Kənan artıq ''Yuve''nin əsas komandasında 5 rəsmi oyun keçirsə də, hələ ki, qol hesabını aça bilməyib. Rəhbərliyin qərarı ilə 2005-ci il təvəllüdlü iki futbolçu - Kənan Yıldız və niderlandlı mərkəz müdafiəçisi Din Huysen bundan sonra yalnız ''Yuventus''un əsas komandası ilə məşqlərə çıxacaqlar. Yıldız artıq Türkiyə yığmasında debüt etməyə də macal tapıb. Ötən ay Vinçentso Montella tərəfindən ilk dəfə yığmaya dəvət alan istedadlı yarımmüdafiəçi Xorvatiya ilə oyunun son anlarında meydana çıxmışdı. Noyabrın 18-də Türkiyə yoldaşlıq oyunu çərçivəsində Berlində Almaniya ilə qarşılaşacaq.

Almaniyanın ''Bild'' nəşri eyni zamanda alman vətəndaşlığı olan və qeyd etdiyimiz kimi ''Bavariya''da yetişən Yıldız ilə söhbətləşmək qərarına gəlib. Türkiyə yığmasını seçməsinin, eləcə də ''Yuventus''a üstünlük verməsinin səbəbləri barədə danışan Yıldız bunları deyib: ''Anam alman, atam türkdü. U-17 yığmasından bu yana Türkiyə üçün oynamışam və bununla qürur duyuram. Almanlar mənimlə heç maraqlanmadı. Federasiyadan heç kim mənimlə əlaqə saxlamadı. Yəni heç seçim arasında da qalmadım. Türkiyə yığmasında forma geydiyim üçün xoşbəxtəm. İtaliyaya, burdakı oyun tərzinə və buranın dilinə uyğunlaşmaq üçün əvvəlcə ''Yuve''nin U-19 komandasında oynamağa başladım. Bu yay əsas komanda ilə ABŞ-dakı toplanışa dəvət aldım. Mənim üçün inanılmaz bir təcrübə oldu. Çünki əsasən televizordan izlədiyim Vlahoviç, Kyeza kimi ulduzlarla birlikdə məşq etmək, oynamaq fürsətim yarandı. Alleqridən tərif eşitmək çox xoşdu. O mənə hədəflərimə çatmaq üçün doğru yolu göstərdi. Həm mükəmməl məşqçi, həm də əla insandı. İlk vaxtlar oteldə qalırdım

Sonra ailəm də İtaliyaya köçdü və birlikdə yaşamağa başladıq. ''Yuve''də debüt etdiyim an xəyallarım çin oldu. Bacco, Zidan, Del Pyero kimi keçmişdəki ideallarımın top qovdugu klubda artıq mən də oynayırdım. İtalyan dilini günü-gündən daha yaxşı anlayıram. Hətta az-az danışmağa başlamışam. Bəxtim gətirib ki, anam italyan dilində mükəmməl danışır. Heyif ki, uşaq vaxtı mənimlə italyan dilində danışmağa üstünlük vermirdi. Yoxsa indi bu dili çox yaxşı anlayardım''.

ƏLİ