''Beşiktaş''da növbəti ciddi dəyişiklik yaşanıb.

"Football-plus.az" xəbər verir ki, ən son ''Bude/Qlimt''ə qarşı oyunun gedişində doğma fanatları tərəfindən etirazla qarşılanan və matç ərzində bir neçə dəfə ''səni istəmirik'' sözlərini eşitmək məcburiyyətində qalan məşqçi Burak Yılmaz istefa verib. Srağagün rəhbərliklə görüşən 38 yaşlı futbol adamı öz istəyi ilə klubdan ayrılıb. Xatırladaq ki, Yılmaz zatən bu vəzifəni müvəqqəti icra edirdi. Mövsümün əvvəlindən Şenol Günəşin köməkçisi olan Burak təcrübəli mütəxəssisin istefasından sonra komandanın başına keçmişdi. Amma onun müstəqil məşqçi kimi ilk təcrübəsi uğursuz alındı. ''Qartal'' onun başçılığı altında keçirdiyi 6 rəsmi oyundan 2 qələbə, 4 məğlubiyyətlə ayrılmış oldu. Maraqlıdı ki, ayrılığın ardından Yılmaz ''instaqram'' səhifəsində ''Beşiktaş''a aid bütün paylaşımlarını silib! Artıq yeni məşqçi bəllidi. Bu, ''Beşiktaş''ın başına keçmək üçün uzun müddətdi dəridən qabıqdan çıxan Rza Çalımbaydı. Türkiyənin ən təcrübəli məşqçilərindən sayılan, son olaraq ''Sivasspor''u ardıcıl 3 il avrokuboklara daşımaqla adından söz etdirən Çalımbay 2-ci dəfə ''ağ-qaralar''ın başına keçib. O, daha öncə 2005-ci ildə yanvardan oktyabra qədər bu vəzifəni icra etmişdi. O vaxt ''Beşiktaş'' bu məşqçi ilə 31 oyundan 18 qələbə, 8 bərabərlik, 5 məğlubiyyətlə ayrılmışdı. Onu da bildirək ki, əslində Çalımbayın bu təyinatı müvəqqəti xarakter daşıyır. O, prezident seçkilərinə, yəni dekabrın 3-nə qədər komandanı pulsuz çalışdırmağa razılıq verib. Yeni seçiləcək rəhbərlik Çalımbay ilə yola davam etmək istəsə, məşqçi vəzifəsində qalacaq və ən azı ikiillik müqaviləyə imza atacaq. Yeni rəhbərlik bu məşqçi ilə çalışmaq istəməsə, onunla yollar ayrılacaq.

ƏLİ