Superliqanın iki təmsilçisində yeni baş məşqçi təyinatı reallaşıb.

“Football-plus.az” xəbər verir ki, mövsümə ardıcıl 3 məğlubiyyətlə başlayan və Əmrə Belözoğlu ilə yollarını ayıran “İstanbul BŞ”, gözlənildiyi kimi, Çağdaş Atanla anlaşıb. Dünən klubun bazasında bu mütəxəssisin imza mərasimi keçirilib. Onunla “2+1” illik müqavilə imzalanıb.

Qeyd edək ki, 43 yaşlı Atan ötən ilin yayından bəri “Kayserispor”u çalışdırırdı. Amma “İstanbul BŞ”dən təklif alandan sonra öz istəyi ilə Kayseri klubundan ayrılmağa qərar verdi. Atan imza mərasimində bunları deyib: “Mənim üçün çox həyəcanlı və qürurlu gündü. “İstanbul BŞ” ölkə futbolunda xüsusi yeri olan, çempionluq yaşayan və dəfələrlə ölkəmizi avrokuboklarda təmsil edən bir klubdu. İnşallah, “İstanbul BŞ”ni yenidən çempionluğa və “avrokubok zonası”na iddialı bir kollektivə çevirmək istəyirik”. İmza mərasimində iştirak edən başqan Göksəl Gümüşdağ klubdan ayrılmaq ehtimalı olan iki futbolçunun – Berkay Özcanla Dəniz Türücün durumuna aydınlıq gətirib. Berkayın adı “Qalatasaray”, Dənizin adı isə “Beşiktaş”la yanaşı hallanırdı. Amma Gümüşdağ bu futbolçuların heç yerə getməyəcəyini bildirib. O, Berkayla yaxınlarda üçillik yeni müqavilə imzalayacaqlarını, Dənizin müqaviləsinin isə mövsümün gedişində yenilənəcəyini vurğulayıb.

Çağdaş Atanın ayrılmasından sonra baş məşqçisiz qalan “Kayserispor” da artıq yeni baş məşqçisini rəsmən açıqlayıb. Bu, Rəcəp Uçardı. 47 yaşlı mütəxəssislə ikiillik müqavilə imzalanıb. Daha öncə “İstanbul BŞ” və “Beşiktaş”da köməkçi məşqçi kimi çalışmış Rəcəp Uçar daha çox “Ümraniyəspor”un başında əldə etdiyi nəticələrlə diqqəti çəkməyi bacarmışdı. İstanbul təmsilçisi 2021/22-ni 1-ci liqada 2-ci pillədə tamamlayaraq 74 illik tarixində ilk dəfə elitada oynamaq haqqı qazanmışdı. Amma bu kollektiv ötən mövsüm elitada sürpriz etməyi bacarmayaraq sonuncu pilləni tutmuş və yenidən aşağı liqaya yuvarlanmışdı. Rəcəp Uçar isə nəticələrin düzəlmədiyini görərək aprelin ortalarında istefa vermişdi. “Ümraniyəspor” bu mütəxəssisin başçılığı altında 97 rəsmi oyundan 42 qələbə, 22 heç-heçə, 33 məğlubiyyətlə ayrılmışdı. “Kayserispor”u həftəsonu superliqanın 5-ci turu çərçivəsində “Qaziantep”lə oyun gözləyir. Xatırladaq ki, Antep təmsilçisi də yenicə baş məşqçisini dəyişdirən klublardandı. Hələ hesabında xal olmayan “Qaziantep” köhnə-yeni baş məşqçi Marius Şumudikanın başçılığı altında ilk oyununa çıxacaq.