Ağabala bundan sonra maska ilə oynayacaq! – Şahin Diniyev xəbər verdi
“Səbail”in kapitanı Ağabala Ramazanovun müayinə üçün Türkiyəyə yollandığını xəbər vermişdik.
O, dünən qardaş ölkədən Azərbaycana qayıtmalıydı. Bəs müayinələr başa çatıbmı? Səbirsizliklə gözlənilən məsələlərdən biri futbolçunun karyerasına davam edib-etməyəcəyidi. Bu suallarla “Səbail”in baş məşqçisi Şahin Diniyevə müraciət etdik. Onun “Football-plus.az”a söylədikləri:
“Bəli, Ağabala vətənə dönüb. Bütün müayinələrdən keçib. Beyni, qulağında olan problem, ümumiyyətlə, bütün sinir sistemi, baş, bədən yoxlamaları qənaətbəxş cavablarla nəticələnib. Şükür Allaha, vəziyyəti yaxşıdı. Təxminin 2 ay sonra həkim nəzarətində yüngül məşqlərə başlaya bilər. Oynamaq üçün isə maska taxmalıdı. Onun üçün Allahdan ən xeyirlisini diləyirəm”.
Maraq üçün qeyd edək ki, “Çelsi”nin məşhur qapıçısı Pyotr Çex və bir çox başqa futbolçu da uzun müddət maska taxaraq meydana çıxıb.
Xartırladaq ki, Ağabala 12-ci turun "Turan Tovuz"la ev oyununda rəqibin müdafiəçi Faiq Hacıyevlə mübarizə zamanı başından və çənəsindən zərbə almışdı.
KƏNAN BAHADIR
Digər xəbərlər
