''Beşiktaş''da əsas komandadan kənarlaşdırılan və qış transfer dönəmində satılacağı güman edilən Vensan Abubakardan üzücü xəbər gəlib.

Belə ki, Kamerun yığmasının düşərgəsində olan və bu gün start götürəcək Afrika Millətlər Kubokuna hazırlaşan təcrübəli forvard son məşqlərin birində zədələnib. Kamerun mənbələrinin iddiasına görə zədə ciddidi və Abubakarın hətta turniri buraxacağı da gözlənilir. Bu, ''Beşiktaş'' üçün də pis xəbərdi. Çünki rəhbərlik Abubakarı sərfəli qiymətə satmaq niyyətində idi. Xüsusilə də Braziliya təmsilçisi ''Qremio'' Abubakara çox ciddi maraq göstərirdi. Bu klubun prezidenti Alberto Querra son açıqlamasında 32 yaşlı forvardı ən qısa zamanda heyətə qatmaq üçün əllərindən gələni edəcəklərini bildirmişdi.

Xatırladaq ki, Abubakar dekabrın 9-da ''Fənərbaxça''ya qarşı derbidən sonra daha 4 futbolçu ilə birlikdə heyətdən kənarlaşdırılıb. Bu 5 oyunçudan 2-si - Erik Bayi ilə Jan Onana artıq komandanı tərk edib. Abubakarın bu mövsüm 22 rəsmi oyunda 11 qol, 3 məhsuldar ötürmə ilə fərqləndiyini bildirək.

ƏLİ