''Beşiktaş''lıların gözlədiyi transfer nəhayət ki, baş tutdu.

Kriştiano Ronaldonun transferindən sonra ''Əl-Nəssr''ə lazım olmayan və klubla müqaviləsini qarşılıqlı şəkildə ləğv edən Vensan Abubakar bu gün səhər saatlarında İstanbula ayaq basdı. Viza və sənədlərin yoxlanılması üzündən təxminən saatyarım hava limanında gözləmək məcburiyyətində qalan 30 yaşlı futbolçunu hətta saat 05.30-da da ''Beşiktaş'' fanatları qarşılamağa gəlmişdi. Kamerunlu hücumçu ən qısa müddətdə tibbi müayinədən keçdikdən sonra müqaviləyə imza atacaq. Onun hətta sabah ''Kayserispor''a qarşı oyunda meydana çıxacağı da istisna edilmir. Anlaşmanın detallarına gəlincə, müqavilə 1 ili şərti olmaqla 3,5 illik nəzərdə tutulub. Abubakarın illik qazancı 2,5 milyon avro təşkil edəcək. Müqavilədə daha 500 min avro performans bonusu nəzərdə tutulub.

Xatırladaq ki, bu, Abubakarın ''Beşiktaş''a 3-cü gəlişidi. O, daha öncə 2016/17 və 2020/21 mövsümlərində klubun şərəfini qoruyub və hər iki halda da çempionluq sevinci yaşayıb. Ümumilikdə Abubakar ''Beşiktaş''da indiyə qədər 67 rəsmi oyunda 35 qol, 9 məhsuldar ötürməlik diqqətçəkən performans sərgiləyib.