“Beşiktaş”da baş məşqçi mövzusundakı qeyri-müəyyənlik, nəhayət, başa çatmaq üzrədi.

"Football-plus.az" xəbər verir ki, məlum olduğu kimi, İstanbul nəhənginin bu mövsümdəki 3-cü məşqçisi olan Rza Çlımbay dekabrın 22-də istefaya göndərilmişdi. “Qartal” son 2 oyuna U-19-un çalışdırıcısı Sərdar Topraktəpə ilə çıxmışdı. Bu müddətdə əvvəlcə fransalı Bruno Jenezio, sonra da niderlandlı Covanni van Bronkhortsla anlaşmaq mümkün olmamışdı. Sonradan Mirça Luçesku ilə danışıqlar aparılsa da, onun ağır şərtləri rəhbərliyi qane etməmişdi. Srağagün başqan Hasan Arat özü şəxsən Portuqaliyaya gedərək Fernando Santuşla anlaşdı. Elə həmin gün portuqaliyalı mütəxəssisin təyinatı klub tərəfindən rəsmən açıqlandı. Santuş dünən yerli vaxtla saat 20.30-da köməkçiləri ilə birlikdə İstanbula ayaq basdı. Bu gün isə saat 12.00-da onun üçün imza mərasimi keçiriləcək. Müqavilənin ilyarımlıq olacağı gözlənilir. Santuş “Beşiktaş”ın 113 illik tarixində 34-cü əcnəbi və 2-ci portuqaliyalı məşqçi olacaq. Daha öncə “ağ-qaralar”ı portuqaliyalılardan yalnız Karlos Karvalyal (2011-12) çalışdırıb.

69 yaşlı Santuş Portuqaliyanın və dünya futbolunun tanınmış mütəxəssislərindən biridi. Futbolçu kimi iki klubun – “Maritimu” ilə “Eştoril”in şərəfini qoruyan Santuş məşqçi karyerasında da 1988-də “Eştoril”də başlayıb. Vətənində “Portu”, “Sportinq”, “Benfika”, Yunanıstanda “Panatinaikos”, PAOK və AEK kimi nəhəng klubları çalışdırıb. “Portu” ilə biri çempionluq (1998/99) olmaqla 5 titul, AEK-lə isə Yunanıstan kubokunu (2001/02) qazanıb. 2010-dan bəri klub futbolundan uzaqlaşıb. 2010-14-cü illərdə çalışdırdığı Yunanıstanı AÇ-2012-yə, DÇ-2014-də bu komandanı tarixində ilk dəfə pley-offa daşıyıb. Santuş karyerasının ən böyük uğurlarını 2014-22-ci illərdə çalışdırdığı Portuqaliya yığması ilə əldə edib. Ölkəsinin komandası ilə AÇ-2016-nın qalibi olubsa, 2019-cu ildə tarixdəki ilk Millətlər Liqasını da qazanıb! Amma bu məşqçinin son işi çox uğursuz alındı. Santuş ötən ilin yanvarında böyük ümidlərlə Polşa yığmasının başına keçsə də, burda cəmi 6 oyuna çıxa bildi (3 qələbə, 3 məğlubiyyət) və sentyabrda istefaya göndərildi. Beləliklə, ünlü mütəxəssis 14 illik fasilədən sonra yenidən klub futbolunda çalışacaq.