''Beşiktaş''da baş məşqçi mövzusu ətrafında qeyri-müəyyənlik davam edir.

“Football-plus.az” xəbər verir ki, danışıqlar aparılan məşqçilərlə heç cür müqavilə imzalamaq mümkün olmur. Belə görünür, Covanni van Bronxorstun da təyinatı baş tutmayacaq. Halbuki niderlandlı mütəxəssislə ilkin anlaşma əldə olunmuşdu. Amma Türkiyə mətbuatının yazdığına inansaq, Van Bronxorst dünən tribunadan izlədiyi oyunda ''Beşiktaş''ın ''Kasımpaşa'' qarşısındakı zəif performansını gördükdən sonra bu klubun başına keçmək fikrindən daşınıb! ''Sözcü'' nəşrinin iddiasına görə Van Bronxorst oyundan sonra prezident Hasan Arata bu oyunçularla çalışmaq istəmədiyini və heyətin səviyyəsinin yetərli olmadığını vurğulayıb. Bununla da ''Beşiktaş''da Van Bronxorst dönəmi başlamadan bitdi. Digər iddiaya görə isə Van Bronxorst öz köməkçisi qismində görmək istədiyi Pol van Qasteli öz klubundan ayıra bilməyib. ''Breda'' nu mütəxəssisi buraxmaq istəməyib. Bu da Van Bronxorstun təyinatının baş tutmamasının səbəblərindən biridi. Artıq rəhbərlik digər namizədlərə yönəlməli olub. Son xəbərlərdə Mirça Luçeskunun adının ön plana çıxdığı qeyd olunur. ''Beşiktaş''a 2003-cü ildə, yəni 100 illik yubileydə çempionluq sevinci yaşadan ünlü mütəxəssis ən son Kiyev ''Dinamo''sundan ayrıldıqdan bu yana ailəsi ilə birlikdə vətəni Rumıniyada istirahət edir. Aratın Luçesku ilə danışıqlar aparmaq üçün Rumıniyaya yollanacağı istisna edilmir. Namizədlər arasında İvan Yovanoviçin də olması diqqət çəkir. Təcrübəli serbiyalı mütəxəssis ən son ''Panatinaikos''u çalışdırırdı. Amma Afina təmsilçisi Yovanoviçlə vidalaşaraq onun yerinə Fatih Terimi gətirməyə üstünlük verdi. ''Panatinaikos'' bu məşqçi ilə ötən mövsümü 2-ci pillədə tamamlamışdı.

ƏLİ