Türkiyənin iddialı klublarından olan “Adana Dəmirspor”da maraqlı olaylar yaşanır.

"Football-plus.az" xəbər verir ki, yığmamızın üzvü Şahruddin Məhəmmədəliyevin şərəfini qoruduğu klub bir-birinin ardınca önəmli futbolçularla vidalaşır.

Xatırladaq ki. Adana təmsilçisi ötən mövsümü Vinçentso Montella ilə 4-cü pillədə tamamlamış və tarixində ilk dəfə avrokuboklarda oynamaq haqqı qazanmışdı. Yayda Patrik Klyuvertlə anlaşan komanda Konfrans Liqasında iki mərhələ adlasa da, qrupa vəsiqə qazana bilmədi. Çempionata isə adanalılar pis başlamamışdılar. 10-cu turdan sonra komanda 3-cü pillədə idi. Amma həmin vaxtdan bəri 7 tura cəmi 1 qələbə qazanaraq 6-cı pilləyə qədər geriləyiblər.

Dekabrın 4-də Klyuvertlə yollar ayrılmışdısa, indi də bir-bir aparıcı futbolçular kənarlaşdırılır. Bir müddət öncə “Adana Dımirspor”da maliyyə problemlərinin yaşanması və bu üzdən əsas futbolçuların ayrılacağı barədə söhbətlər yayılmışdı. Başqan Murat Sancak belə problemin olduğunu qismən təsdiqləmişdi. Artıq “yarpaq tökümü”nə start verilib. Dekabrın 24-də fransalı müdafiəçi Andrea Qravilyonla yollar ayrıldı. Dünən növbə Yunes Belhandaya çatdı. Daha öncə “Qalatasaray”la iki dəfə çempionluq yaşamış mərakeşli futbolçunun müqaviləsi qarşılıqlı razılıqla ləğv olundu. 2021-dən bəri “Adana Dəmirspor”un şərəfini qoruyan 33 yaşlı yarımmüdafiəçi bu klubda 74 rəsmi oyuna çıxaraq 19 qol vurmuşdu. Belhandanın karyerasını Səudiyyə Ərəbistanında və ya Qətərdə davam etdirəcəyi gözlənilir.

Sırada daha iki futbolçu var. Yeni ilə qədər Badu N`Diaye ilə Kevin Rodrigesin də müqaviləsinin ləğv olunacağı gözlənilir. Hər iki futbolçu ilə danışıqlar davam edir. Türkiyədə daha öncə “Osmanlıspor”, “Qalatasaray”, “Trabzonspor” və “Fatih Karagümrük”ün şərəfini qoruyan 33 yaşlı seneqallı N`Diaye Adanada 2-ci mövsümünü keçirirdi. O, bu klubda 44 oyun və 8 qol göstəriciləri ilə yadda qaldı. Elə ispaniyalı sol müdafiəçi Rodriges də klubda 2-ci mövsümünü keçirirdi. Onun hesabında isə 51 rəsmi oyunda 2 qol var idi.

ƏLİ