Həmişə olduğu kimi, yenə də il sona yaxınlaşdıqca əksər ölkələr 2024-cü il üçün idman hədəflərini müəyyənləşdirir.

"Football-plus.az" xəbər verir ki, əlbəttə, gələn ilin həlledici hadisəsi Parisdə keçiriləcək Yay Olimpiya Oyunları olacaq. Aydın məsələdi ki, bütün Olimpiadalara iddialı qatılan Rusiya yığmasının məlum səbəbdən kənarda qalması qalan nəhəngləri sevindirən məqamdı. Belədə dördilliyin ən mötəbər idman yarışının favoritləri indidən sakitcə kağız üzərində medalları bölməklə məşğuldular. Özü də bu iş o qədər də çətin deyil. Gerçəklik budu ki, ABŞ yığmasının medal hesabında 1-ci, Çin yığmasının isə 2-ci olacağına faktiki heç kim şübhə etmir.

Tokioda keçirilən sonuncu Olimpiadaya nəzər salaq. ABŞ yığması az qala sensasiyalı şəkildə liderliyi əldən verəcəkdi. Çinlilər son ana qədər “yankilər”i təqib etdi. Ancaq bu izləmə hadisələrin uğurlu axarından doğdu, çətin ki, Parisdə də təkrarlana. Etiraf edək: son onilliklər ərzində Olimpiya Oyunlarının proqramı elə düzəlişə məruz qalır ki, ABŞ-dan olan idmançılar daha çox qələbə qazansın. Və yalnız yüngül atletikadakı, eləcə də bəzi oyun idman növlərindəki uğursuzluqlar 2021-ci ildə az qala böyük sensasiyaya səbəb olacaqdı. Amerikalılar ikinci dəfə eyni palçığa batmaq istəməyəcək.
Olimpiada ilə bağlı proqnozları, adətən, həqiqətə yaxın olan “Gracenote” agentliyi hesab edir ki, ABŞ yığması gələn il Fransa paytaxtında 37-si “qızıl” olmaqla ümumilikdə 126 medal qazanacaq. Müqayisə üçün xatırladaq ki, amerikalılar Tokioda 39 “qızıl” və cəmi 113 medal qazanmışdılar. Onların Rio-de-Janeyro Olimpiadasındakı nəticəsi fantastik idi – 121 medal, 46-sı qızıl. Aydındı ki, 100+ nəticəsini heç bir başqa yığma hətta arzulaya da bilməz. Çinlilər Pekin Olimpiadasında ümumu zaçotda qalib gəlsələr də, indi 2-ci pillədən yuxarı tullanmaq onlar üçün real deyil. Heç burdan aşağı düşəcəklərini də gözləməyə dəyməz.

Odu ki, Paris Olimpiadasının medal hesabı ilə bağlı əsas intriqa 3-cü yer uğrunda mübarizədən ibarətdi. Çoxları meydan sahibi fransalıları 3-cü pilləyə əsas iddiaçı sayır, onların əsas rəqibi kimi isə britaniyalıları görürlər. Fransanın idman naziri Ameli Udea-Kastera bir müddət əvvəl belə demişdi: “Olimpiya Oyunları üçün əsas hədəfimiz ən çox medal qazanan ölkələrin ilk “5-liy”inə daxil olmaqdı. Bu vəzifənin öhdəsindən gəlmək üçün 16 və ya 17 qızıl medal qazanmaq lazımdı. Və bu, tam öhdəsindən gələ biləcəyimiz vəzifədi”.

“Gracenote” agentliyinin Olimpiada-2024 üçün medal proqnozu
1 2 3 4
1. ABŞ 37 45 44 126
2. Çin 35 25 18 78
3. B.Britaniya 17 24 25 66
4. Yaponiya 15 13 30 58
5. Fransa 27 15 9 51
Olimpiada-2020-nin medal yekunu (ilk 10-luq)
1. ABŞ 39 41 33 113
2. Çin 38 32 19 89
3. Yaponiya 27 14 17 58
4. B.Britaniya 22 20 22 64
5. Rusiya 20 28 23 71
6. Avstraliya 17 7 22 46
7. Niderland 10 12 14 36
8. Fransa 10 12 11 33
9. Almaniya 10 11 16 37
10. İtaliya 10 10 20 40
Qeyd: 1 – qızıl, 2 – gümüş, 3 – bürünc, 4 – cəmi.