Türkiyənin qadınlardan ibarət voleybol yığması finalda Çini məğlub etməklə sensasiyalı şəkildə Millətlər Liqasının qalibi oldu.

"Football-plus.az" xəbər verir ki, qardaş ölkədə voleybol həmişə sevilən idman növü olub, yığma da daim elitaya yaxın olub, sadəcə, hər dəfə sonda nəsə çatmayıb. Bəs indi nə dəyişib, Daniele Santarellinin yetirmələri daha nəyə qadirdi? Qonşu ölkənin yığmasını Paris Olimpiadasında qızıl medallara əsas namizədlərdən saymaq olarmı?

Cəmi iki dəfə Olimpiadada oynayıblar
Türkiyənin qadınlardan ibarət voleybol yığması daim möcüzə gözləyə biləcəyin komandalardandı. Ancaq bu yığma hər dəfə ümidləri doğrultmurdu, lokal uğurlara baxmayaraq, dünya arenasında sözünü deyə bilmirdi. Türkiyə tarixində cəmi iki dəfə Olimpiadaya qatılıbsa, başqa sözə nə hacət?! Özü də heç nə il yadda qalmadan – “filenin sultanları” 2012-də qrupdan çıxmayıbsa, iki il əvvəl gözlənilmədən 1/4 finala vəsiqə qazansalar da, bu mərhələdə heç də ən güclülərdən sayılmayan Koreyaya uduzublar. Halbuki Türkiyə çempionatı dünyada ən güclü liqalardan sayılır, Türkiyə komandaları müntəzəm Çempionlar Liqasını qazanırlar, dünya ulduzları bu ölkədə oynamağa can atırlar. Türkiyə yığmasının tərəqqisində bu ölkədə oynayan güclü legionerlərin də müəyyən rolu var. Belədə çempionatın ümumi səviyyəsi artır.

Təbii ki, Türkiyə yığması addım-addım tərəqqi edir. 2003-cü ildə evdə keçirilən Avropa çempionatında sensasiyalı şəkildə finala çıxan “ay-ulduzlular” son 10 ildə müntəzəm top-4-də yer alırlar. Qonşu ölkənin yığması tədricən Amerika və Asiya yığmaları ilə oynamağı da öyrənib. Lap tutaq ki, türkiyəli xanımların dünya çempionatında medalı yoxdu, ancaq Millətlər Liqasının gümüş və bürünc medalları da ləyaqətli nəticədi. Bu il isə Türkiyə, nəhayət, tarixində ilk böyük beynəlxalq titul qazandı. Avroliqa və Avropiadadakı qələbələri nəzərə almasaq, bu, Türkiyə yığmasının tarixində ilk qızıl medaldı. Adı çəkilən turnirlər heç bir halda Millətlər Liqası ilə müqayisə oluna bilməz. Türklər qələbəyə iddiasını hələ ilkin mərhələdə göstərmişdi, pley-offu isə möhtəşəm keçirdilər.

Avropa çempionatında nə edəcəklər?
Millətlər Liqasının final mərhələsi bu dəfə ABŞ-da keçirildi. Amerikalılar turnirin favoriti sayılırdı. Həm meydan sahibi olduqlarına, həm də komandanın indiki durumuna görə. Bununla belə, ABŞ yığmasının problemləri elə ilk oyunda üzə çıxdı. “Yankilər” Yaponiyanı 4 setdə məğlub etdisə, Türkiyə İtaliyanın işini üç setdə bitirdi. Paralel keçirilən oyunlarda, gözlənildiyi kimi, Polşa Almaniyaya qalib gəldi, Çin isə Braziliyanı məğlub etdi – ilkin turniri uğursuz keçirən iki nəhəng artıq 1/4 finalda üz-üzə gəldi. Çinlilər pley-offda toparlandılar və braziliyalıların ardından sakitcə Polşanı – dünya reytinqinin liderini də məğlub etdilər. Bir qədər sonra Türkiyə və ABŞ yığmalarının oyununda finala 2-ci vəsiqənin sahibi müəyyənləşdi. İlk setin əvvəlində meydan sahibləri üstün təsir bağışlasalar da, türklər setin sonluğunu əla keçirərək rəqibi üstələdilər. ABŞ yığmasının voleybolçuları necə ruhdan düşdülərsə, 2-ci setin əvvəlində əməlli-başlı fərq açıldı – artıq türklərə çatmaq mümkün deyildi. 3-cü setdəki qələbə amerikalıları bir qədər ümidləndirsə də, türklər oyunun taleyini tay-breykə saxlamaq fikrində deyildi. 4-cü set onların qələbəsiylə bitdi. Belədə “boyundan yuxarı tullananları” yerində oturtmaq vəzifəsi Çinin üzərinə düşdü. Ancaq qadın voleybolunun əvvəlki liderləri Tokio-2020-dən bəri mövqeyini əldən verməkdədi. Onlar finalda qonşularımıza ciddi müqavimət göstərə bilmədilər.

Aydın məsələdi ki, Millətlər Liqasının qalibi olan “filenin sultanları” inanılmaz özünəinam qazanıb. Ancaq müasir voleybol o dərəcədə izaholunmazdı ki, Olimpiya Oyunlarının startına bir il qalmış bu və ya başqa komandanın turnir perspektivləri haqda danışmaq mənasızdı. Ən azı Türkiyə yığmasının Avropa çempionatındakı oyununa baxmaq lazımdı. Artıq üç aydan sonra Belçika, İtaliya, Estoniya və Almaniya qitə birinciliyinin oyunlarını qəbul edəcək. Sözsüz, Türkiyə qarşıdakı turnirin əsas favoritlərindən biri olacaq.

1/4 final. Polşa – Almaniya 3:1 (25:12, 21:25, 25:21, 26:24), Braziliya – Çin 1:3 (21:25, 20:25, 25:20, 23:25), ABŞ – Yaponiya 3:1 (25:23, 25:21, 18:25, 25:18), Türkiyə - İtaliya 3:0 (25:20, 25:15, 25:18).
Yarımfinal. Polşa – Çin 0:3 (18:25, 23:25, 23:25), ABŞ – Türkiyə 1:3 (21:25, 14:25, 26:24, 25:17).
3-cü yer uğrunda oyun. Polşa – ABŞ 3:2 (25:15, 16:25, 25:19, 18:25, 17:15).
Final. Çin – Türkiyə 1:3 (22:25, 25:22, 19:25, 16:25).