Hər iki komanda meydana qələbə üçün çıxmışdı.

Belə ki, qalib ən azı birgünlüyə 3-cü pilləyə yüksələcəkdi. Hakimin start fitindən sonra meydanda 20 dəqiqədən çox sönük, kəşfiyyat xarakterli oyun getdi. Qapıya ilk zərbə meydan sahiblərindən gəldi. Səbuhidən ötürmə alan Sorqanın sevinməsinə qapıçı imkan vermədi. Qonaqlar buna Yusifin qeyri-dəqiq cərimə zəbəsiylə cavab verdi. 30-cu dəqiqədə Rövlanın qapı önünə asmasına Elvin yüksəlsə də, top qapıdan yan keçdi. Ramalinqomun hücumundan da nəticə hasil olmadı. Mehremiçinin cərimə zərbəsi də boşa çıxdı. Komandalar fasiləyə qolsuz bərabərliklə yollandı.

2-ci yarıda meydanda yaradıcı futbol görmədik. Hər halda, qol vuruldu. 70-ci dəqiqədə Xaçayev, Kehat və Abdullazadənin təşkil etdiyi sürətli hücumdan sonra Səbuhinin qapı önünə asmasını uzaqlaşdırmaq istəyən Mehremiç avtoqol müəllifi oldu. Qoldan sonra "kimyaçılar" topa nəzarəti təmin etdi. 83-cü dəqiqədə Rövlanın cəriməz zərbəsinə Səlahət seyvlə cavab verdi. Amilin həmləsi isə uğursuz oldu. Hakimin final fiti "Sumqayıt"ın qələbəsini və 3-cü yerə çıxmasını rəsmiləşdirdi. Düzdü, bir gün sonra “Neftçi” “kimyaçılar”ı həmin pillədən uzaqlaşdırdı.

Gözdən qaçmadı
* "Sumqayıt"ın mətbuat katibi Zaur Xudiyev media sektorunda kənar şəxslərin yer almasını qarşısını alsa da, 2-ci yarıda yenə orda journalist olmayanlar oturdu.
* 44-cü dəqiqədə "Şəhidlər ölməz, Vətən bölünməz" şüarı səslənərkən bütün tribunalar ayağa qalxdı. Amma jurnalistlər lojasında yanını qaldırmayanlar da var idi. Bunu görən azarkeşlər "yoldaş jurnalistlər, şəhidləri yad etmək sizə aid deyil", - deyə söz atdı.
* 77-ci dəqiqədə meydana çıxan Ninqa cəmi 3 dəqiqə sonra zədə üzündən əvəzləndi.
* 83-cü dəqiqədə sumqayıtlı azarkeşlərdən biri meydana butulka atdı. Bu zaman baş hakim butulkanı meydandan kənarlaşdırdı.

ABDULLA İSMAYILOĞLU