Fevralın 12-də Şotlandiya kubokunun 1/8 finalında “Reyncers” öz meydanında çempionşip təmsilçisi “Partik Tistl” ilə qarşılaşdı.

Bu turnirin son qalibi statusunda olan Qlazqo nəhəngi, gözlənildiyi kimi, qalib gəlməklə (3:2) adını növbəti mərhələyə yazdırdı. Amma qarşılaşmanın 70-ci dəqiqəsində diqqətçəkən epizod yaşandı. “Reyncers”in bir üzvü zədə aldığından bu komanda hücuma hazırlaşarkən topu auta göndərdi. Adətən, belə vəziyyətlərdə top yenidən həmin komandaya qaytarılır. Əslində “Partik Tistl”ın müdafiəçisi də topu “Reyncers”ə qaytarmağa hazırlaşırdı. Amma “Bavariya”nın yetirməsi olan və icarə əsasında “Reyncers”də çıxış edən Malik Tillman birdən-birə araya girərək topu rəqib müdafiəçidən oğurladı. 20 yaşlı almaniyalı forvard qapıçını da keçərək topu tora göndərdi!

Təbii ki, meydan sahiblərini 2:1 önə keçirən bu qoldan sonra aləm bir-birinə dəydi. Qonaqlar uzun müddət Tilmanna etiraz etdilər. Bu məqamda araya “Reyncers”in baş məşqçisi Maykl Bil girdi. 42 yaşlı mütəxəssis öz oyunçularına kənara çəkilməyi və rəqibin hesabı bərabərləşdirməsinə şərait yaratmağı tapşırdı. Nəticədə Skott Tiffoni mərkəzdən başladıqdan sonra heç bir müqavimətlə üzləşmədi və rahat çəkildə topu tora göndərdi. Bu epizoddan sonra “Partik Tistl”ın baş məşqçisi Yen Makkol həmkarına təşəkkürünü bildirərək onun əlini sıxdı. Amma qələbə yenə də meydan sahiblərinə qismət oldu. 86-cı dəqiqədə Ceyms Sands “Reyncers”in 3-cü qolunu vurdu.