Oyundan öncə "Neftçi" azarkeşlərinin bir çoxu komandalarının heç olmasa, doğma meydanda qələbə qazancağına ümidli idi.

Lakin Mutunun rəhbərlik etdiyi kollektivdə bir sıra problemlər var idi. Azər Əliyev, Eddi İsrafilov və Ömər Buludovun zədəli olması işləri korlamışdı. Məhz bu səbəbdən rumıniyalı mütəxəssis Fəridlə İsmayılı əsas heyətdə meydana buraxmağa məcbur olmuşdu. Düzdü, Mutu riskə gedərək Kennini sol, Koffini sağ cinah müdafiəçisi kimi oynada bilərdi. Lakin baş məşqçi bu gedişi etmədi.

Qarşılaşmaya hər iki komanda möhtəşəm azarkeş dəstəyi ilə başladı. Lakin daha çox hücum edən tərəf qonaqlar idi. Bunun nəticəsində 14-cü dəqiqədə Abubakar möhtəşəm hərəkətlə iki rəqibi geridə qoyaraq topu Brkiçin başının üzərindən qapıya göndərdi. Hesab açılandan sonra da "Neftçi" özünə gələ bilmədi. Flaqmanın hücum qurmağa gücü çatmırdı. "Beşiktaş" da meydanda çox güc sərf etmirdi. Sadəcə, Günəşin komandasının təcrübəsi öz sözünü dedi. 23-cü dəqiqədə Muleka fərqi artırdı. Bu dəfə qapı önünə cinah ötürməsi oldu, müdafiəçilər yuxuladı və rəqib də onların məsuliyyətsizliyindən yararlandı. İlk yarının sonlarına kimi komandanın cəhdlərinə baxmayaraq, başqa qol vurulmadı.

Mutu səhvini anlamışdı. Bu səbəbdən də fasilədə üç dəyişiklik etdi. Yeni transferlər Ozobiç, Olanare və Koffi müvafiq olaraq Fərid, Azər, İsmayılı əvəz etdi. Bu dəyişikliklərdən sonra Kenni müdafiənin soluna keçdi. Olanare sağ cinah vingeri kimi, Koffi isə öz mövqeyində oynadı. Bu dəyişikliklər "Neftçi"nin hücum potensialını atırsa da, fərqlənən "qara qartal" oldu. Koffi Salihə "əla ötürmə verərək” fərqlənməsi üçün şərait yaratdı.

Qoldan sonra Günəş əsas heyət üzvlərini meydandan çıxartdı. Türkiyəli mütəxəssis nəticənin təmin olunduğunu düşünərək oyunçularına istirahət verdi. "Neftçi" isə irəli atılmağa başladı. 79-cu dəqiqədə hesab arasında fərq azaldı. Ozobiçin dirəşərək topu ələ keçirib Lebona ötürmə verddi. Fransalının zərbəsi dəqiq alındı. Qoldan sonra flaqmanın nəzərəçarpan üstünlüyü hiss olunurdu. Əvvəlcə Eminin cərimə zərbəsindən vurduğu top dirəyə dəydi, daha sonra Ozobiçin zərbəsini müdafiəçilər xətdən çıxartdı.

Beləliklə, çətin keçən qarşılaşmada "Beşiktaş" rahat qələbə qazandı. Mutunun heyətlə bağlı səhvləri "ağ-qaralar"a baha başa gəldi. İstanbul təmsilçisi 3:1 hesablı qələbə ilə, demək olar ki, turu təmin etdi. "Neftçi"nin işi isə Allaha qaldı.

Reaksiyalar
Andre Şinyaşiki: “Mənim üçün xüsusi oyun idi, axı “Neftçi”nin heyətində avrokuboklarda debüt edirdim. Düşünürəm ki, laqiyincə müqavimət göstərdik. İlk yarıda rəqibdən çəkinirdik, ikincidə isə toparlandıq və özümüzü yaxşı tərəfdən göstərdik. Bəzi epizodlarda, sadəcə, bəxtimiz gətirmədi. Birdən artıq qol vura bilərdik. Digər tərəfdən, komandamız yenidi, bir-birimizə öyrəşmək lazımdı”.

İvan Brkiç: “Şübhəsiz, güclü və səviyyəli rəqibə qarşı oynadıq. İlk yarıda açıq-aşkar zəif oynadıq. Demək olar ki, üç qolun hamısını öz kobud səhvlərimiz üzündən buraxdıq. İkinci hissəni hesabımıza yazmaq olar. Rəqibdən yaxşı oynadıq, qol vəziyyətləri yaratdıq. Birdən artıq qol vurmağa borcluyduq. Şansa gəlincə, az da olsa, var. Qarşıdakı cavab görüşünə tam köklənmək və maksimumu göstərmək lazımdı”.

Gözdən qaçmadı
* Hər iki komandanın futbolçuları meydana əllərində ağ-qara şar olan azyaşlı uşaqlarla çıxdılar. Onların arasında “Neftçi”nin Media, Marketinq və İctimaiyyətlə Əlaqələr Departamentinin rəhbəriu Rüstəm Allahverdiyevin qızı da var idi.
* Oyundan əvvəl Günəşlə Mutu bir-birinə uğurlar diləyib, xatirə fotosu çəkdirdilər.
* “Beşiktaş” azarkeşlərinin açdığı pankartda “Bakı sizin üçün deplasman deyil” yazılmışdı.
* 44-cü dəqiədə “Beşiktaş”fanatları “Şəhidlər ölməz, vətən bölünməz” şüarlarını səsləndirdilər. 45-ci dəqiqədə isə azərbaycanlı azarkeşlər və “Forza Neftçi” eyni şüarı təkrarladı.

İLKİN SULTANLI