Bu gün futbol üzrə ölkə çempionatının 1-ci liqasında 7-ci tura start verilir.

"Football-plus.az" xəbər verir ki, gün ərzində 4 oyunun keçirilməsi nəzərdə tutulub.

İlk qarşılaşmada "Şamaxı" "doğma divarlar" arasında "Difai Ağsu"nu sınağa çəkəcək. Ötən həftə səfərdə "İrəvan"ı məğlub edən "şirlər" (3:1) meydana motivasiyalı çıxacaq. Azarkeş dəstəyi də Vüqar Əsgərlinin komandası üçün üstünlükdü. "Difai Ağsu"nun bu matçda autsayder mövqeyindən qurtulması çətin görünür. Geridə qalan 6 matçda ilk qələbəsini qazana bilməyən komandada baş məşqçi ayrılığı yaşanıb. Paşa Əliyevin müvəqqəti əvəzləyicisi Elgiz Kərəmlinin işi asan olmayacaq. Hər halda, iddialı "Şamaxı"sı evdə zəif bəndə məğlub olsa, sensasiya yaşanacaq.

İkinci oyunda "Mingəçevir" başı qalmaqallara qarışan "İrəvan"la mübarizə aparacaq. Ev sahibləri mövsümə uğurlu başlamasa da, qənaətbəxş çıxış edir. Qələbə ortabab kollektivin durumunu daha da yaxşılaşdıra bilər. Qərbi Azərbaycan təmsilçisi isə özünə gəlməlidi. Ardıcıl məğlubiyyətlərdən sonra 3 xal hava-su kimi vacibdi. Ən azı bu matçda itkilər konpensasiya edilməlidi. Yoxsa baş məşqçi Nazim Süleymanov iddialı rəqiblər qarşısında çıxılmaz vəziyyətə düşə bilər.

Günün 3-cü oyunu İmişlidə keçiriləcək. Bölgənin eyniadlı komandası "Zaqatala" ilə üz-üzə gələcək. Hər iki tərəf ötən turun matçından qalib ayrılıb. Bu üzdən maraqlı oyunun şahidi olacağımızı deyə bilərik. Hələlik meydan sahibləri daha üstün görünsə də, məsələyə sabah aydınlıq gələcək.

Nəhayət, günün sonuncu qarşılaşmasında "Araz Saatlı" ilə "Karvan" görüşəcək. Baş məşqçi Rüfət Quliyev komandanı "qara zolaq"dan çıxarmaq niyyətindədi. Lakin yevlaxlılarla çətin sınaqda bunu bacarıb-bacarmayacağı sual altındadı. Çünki qonaqlar ötən həftə məğlub olduğundan matça yetərincə ciddi yanaşacaq. Kənan Kərimovun komandası yuxarı pillələrdən uzaqlaşmaq istəmir.

Qeyd edək ki, sözegedən oyunlar Peşəkar Futbol Liqasının "I Liqa / II Liqa" "yutub" kanalında canlı yayınlanacaq.

1 noyabr
Şamaxı – Difai Ağsu 2:0
Elşad Tağıyev, 16. Cəlal Cəbrayılov, 45.
Şamaxı, şəhər stadionu. Saat 14.00.

Mingəçevir – İrəvan 0:2
Vüsal Əsgərov, 45+2-p. Famil Camalov, 89.
Mingəçevir, Yaşar Məmmədzadə adına şəhər stadionu. Saat 14.00.

İmişli – Zaqatala 4:0
Xəzər Mahmudov, 37, 57. Həzrət İsayev, 52. Muxtar Nəzərli, 76.
İmişli, şəhər stadionu. Saat 14.30.

Araz Saatlı – Karvan 1:5
Rəvan Əvəzov, 90 - Ruslan Voronsov, 31, 40. Peter Kinqs, 48, 84. Elnur Mustafazadə, 70.
Saatlı, OİK stadionu. Saat 14.30.

“Qaradağ Lökbatan” – MOİK oyunu sabah keçiriləcək.

Xal durumu: Şamaxı, MOİK - 14, Qaradağ Lökbatan, İmişli, İrəvan - 13, Mingəçevir - 7, Zaqatala - 6, Araz Saatlı - 3, Difai Ağsu - 1.

Bombardirlər: Elşad Tağıyev (Şamaxı) - 6, Emin Zamanov (Şamaxı) - 5.

KƏNAN BAHADIR