Dünən futbol üzrə ölkə çempionatının 1-ci liqasında 7-ci tura start verildi. Gün ərzində 4 oyun keçirildi.

İlk görüşdə “Şamaxı” “Difai Ağsu”nu qəbul etdi. “Şirlər”in autsayder üzərində qələbə qazanması gözlənilirdi ki, belə də oldu – 2:0. Nəticədə Vüqar Əsgərlinin komandası turnir cədvəlinin 1-ci pilləsində qərarlaşdı. İkinci matçda “Mingəçevir” “İrəvan”la üz-üzə gəldi. Çətin günlərdən keçən Qərbi Azərbaycan təmsilçisi bu dəfə daha güclü heyətlə meydandan qalib ayrıldı – 2:0. Ev sahibləri isə ardıcıl ikinci dəfə məğlub olmaqla enişdə olduğunu göstərdi. Üçüncü matçda “İmişli” “Zaqatala”nı sınağa çəkdi. Əsgər Abdullayevin komandası qonaqlara münasibətdə amansız davrandı – 4:0. Darmadağınla evə dönən zaqatalalılar hələ ki sonuncu pillələrdən qurtula bilmir. “Araz Saatlı”nın “Karvan”la qarşılaşması da dramatik alındı. Daha dəqiq desək, yevlaxlılar qonaq kimi davranmadı və evə böyükhesablı qələbə ilə qayıtdı – 5 qol, 3 xal! Görünür, Rüfət Quliyev də “Araz Saatlı”nın dərdinə çarə tapa bilmir. Ev oyununda böyükhesablı məğlubiyyəti (1:5) başqa necə izah edək?!

Tura bu gün keçiriləcək “Qaradağ Lökbatan” – MOİK oyunuyla yekun vurulacaq. Yekun nəticələrə əsasən deyə bilərik ki, ordu klubu səfərdə liderliyi geri gətirmək uğrunda meydana çıxacaq. Hər halda, Qəzənfər Abbasovun komandası son iki turda ardıcıl darmadağınlarla yadda qalıb (hər ikisi 3:0). Uğurlu seriyanı pozmamaq qonaqlar üçün vacibdi. Lakin ev sahibləri də əliboş deyil. “Qaradağ Lökbatan” son 3 oyundan qalib ayrılıb.

1 noyabr
Şamaxı – Difai Ağsu 2:0
Elşad Tağıyev, 16. Cəlal Cəbrayılov, 45.

Mingəçevir – İrəvan 0:2
Vüsal Əsgərov, 45+2-p. Famil Camalov, 89.

İmişli – Zaqatala 4:0
Xəzər Mahmudov, 37, 57. Həzrət İsayev, 52. Muxtar Nəzərli, 76.

Araz Saatlı – Karvan 1:5
Rəvan Əvəzov, 90 - Ruslan Voronsov, 31, 40. Peter Kinqs, 48, 84. Elnur Mustafazadə, 70.

2 noyabr
Qaradağ Lökbatan – MOİK 1:1
Murad Qayalı, 76 - Ramil Orucov, 62.
Bakı, “Neftçi” Futbol Mərkəzinin 4-cü meydançası. Saat 13.00.
Xal durumu: MOİK - 15, Şamaxı, Qaradağ Lökbatan - 14. İmişli, İrəvan - 13, Karvan – 11, Mingəçevir - 7, Zaqatala - 6, Araz Saatlı - 3, Difai Ağsu - 1.
Bombardirlər: Elşad Tağıyev (Şamaxı) - 7, Peter Kinqs (Karvan) – 5.

KƏNAN BAHADIR