Dünən futbol üzrə ölkə çempioantının 1-ci liqasında 9-cu tura yekun vurulur.

“İrəvan” günün yeganə oyununda “Difai Ağsu”nu qəbul etdi. Ötən sayımızda Qərbi Azərbaycan təmsilçisinin matça ciddi hazırlaşacağını yazmışdıq. Çünki kollektiv mövsümə yaxşı başlasa da, sonradan xeyli xal itkisinə məruz qalmışdı. Durumun düzəlməsi üçün aşkar autsayderlə görüş yaxşı fürsət idi. “İrəvan” bunu bacardı. Nazim Süleymanovun yetirmələri rəqibi 3:1 hesabıyla məğlub etdi.

Tura bu gün və sabah keçiriləcək oyunlarla yekun vurulacaq. Növbəti matçda “Araz Saatlı” MOİK-lə üz-üzə gələcək. Şübhəsiz, qarşılaşma ev sahibləri üçün çətin sınaqdı. Saatlı təmsilçisi hələ də ciddi uğura imza atmayıb. Nə baş məşqçi, nə də hazırlıq prosesi komandaya xeyir verir. Nəticə ortadadı və komanda güclü ordu klubuna qarşı mübarizə aparmaq iqtidarında deyil. Lakin futbolda hər an hər şeyin baş verə biləcəyini nəzərə alsaq, ümidsiz danışmaq doğru olmaz. Hər halda, yuxarı pillələrdəki kollektivlər arasında xal fərqi azdı. Qonaqlar əməlli-başlı qələbəyə köklənib. Rüfət Quliyevin yetirmələri maksimum diqqətli olmalıdı.

İkinci oyunda “Mingəçevir” “Zaqatala”nı qəbul edəcək. Hər iki tərəf, demək olar ki, təhlükəsiz zonadadı. Xüsusilə “nur şəhəri” təmsilçisinin yeri rahat görünür. Lakin rahatlaşmaq komandalara baha başa gələ bilər. Bu üzdən onlar matça məsuliyyətli yanaşıb qələbəyə can atacaq. Meydan sahibləri rəqiblə zarafat etməməlidi. Nə də olsa, zaqatalılar 8-ci turda çempionluğa namizəd “Şamaxı”dan xal qoparıb (1:1).

“İmişli” – “Qaradağ Lökbatan” oyunu da gərgin keçəcək. Bu səbəbdən təcrübəli mütəxəssislərin, yəni Əsgər Abdullayevlə Azər Həşimovun dueli maraqla gözlənilir. Ev sahibləri 5-ci sırada olsa da, liderdən, yəni bugünkü rəqibindən cəmi 3 xal geridədi. Lakin qonaqlar da birinciliyi itirmək niyyətində olmayacaq. Tərəflər qələbə üçün əlindən gələni edəcək. Burda “İmişli” maksimum gücündən istifadə edib lideri büdrətməyə çalışmalıdı. Çünki növbəti xal itkisi ciddi fərqə səbəb ola bilər.

Tura “Şamaxı” – “Karvan” matçıyla yekun vurulacaq. Vüqar Əsgərlinin komandası son vaxtlar ümidləri doğrultmur. Ev oyununda ənənəvi azarkeş dəstəyinin “şirlər”dən yana olduğunu nəzərə alsaq, bu dəfə nəticə qaneedici ola bilər. Yevlaxlıların buna imkan verib-verməyəcəyinə sabah şahidlik edəcəyik. Ümumiyyətlə, 9-cu turda güclülərlə zəiflərin duelləri olacaq. Liderin dəyişməsi də, sensasiyalı nəticələrin qeydə alınması da istisna deyil.

İrəvan – Difai Ağsu 3:1
Arsen Ağcabəyov, 80. Kamal Mirzəyev, 90+4. Cavid Tağıyev, 90+5 - Tahir Zeynalov 75.
22 noyabr. Bakı, “ASK Arena”. Saat 13.00.

Araz Saatlı – MOİK 0:1
Sabir Allahquliyev, 51.
23 noyabr. Saatlı, Olimpiya İdman Kompleksinin stadionu. Saat 14.00.

Mingəçevir – Zaqatala 0:1
Bəhruz Teymurov, 88.
23 noyabr. Mingəçevir, Yaşar Məmmədzadə adına şəhər stadionu. Saat 14.00.

İmişli – Qaradağ Lökbatan 0:0
23 noyabr. İmişli, Heydər Əliyev adına şəhər stadionu. Saat 14.30.

Şamaxı – Karvan 2:4
Emin Zamanov, 45+2-p. Elşad Tağıyev, 47 - Ruslan Süleymanov, 11. Əli Abdullayev, 24-p. Əli Abdullayev, 72-p. Ruslan Voronsov, 84.
24 noyabr. Şamaxı, şəhər stadionu. Saat 14.00.

Xal durumu: MOİK - 19, Qaradağ Lökbatan - 18, İrəvan - 17, Şamaxı, İmişli, Karvan - 15, Mingəçevir - 10, Zaqatala - 10, Araz Saatlı - 3, Difai Ağsu - 1.

Bombardirlər: Elşad Tağıyev (Şamaxı) - 9, Peter Kinqs (Karvan) - 5.

KƏNAN BAHADIR