Luis Suaresin yeni klubu məlum olub. Məşhur futbolçu karyerasını ABŞ-də davam etdirəcək.

Bu ayın əvvəlində Braziliyanın “Qremio” klubundan ayrılan Suares “İnter Mayami”də oynayacaq. Bu xəbəri insayder Fabritsio Romano yayıb.

O, 36 yaşlı uruqvaylı hücumçu ilə birillik müqavilə imzalanacağını bildirib. Şərtə görə, sözləşmənin müddəti sonradan daha bir il artırıla bilər. Qeyd edək ki, Suaresin “Barselona”dan olan bir sıra sabiq komanda yoldaşı da ABŞ klubunda çıxış edir. Onlar Luisin yaxın dostu Lionel Messi, Xordi Alba və Serxio Busketsdi.

Suares “Qremio”ya ölkəsinin “Nasyonal” klubundan bu ilin yanvar ayında sərbəst agent kimi keçmişdi. O, Braziliyanın A seriyasında meydana çıxdığı 33 matçda 17 qol vurub və 11 məhsul ötürmə verib. Luisin bu liqada son mövsümün ən yaxşı oyunçusu seçildiyini də xatırladaq.