Ardıcıl iki qələbə qazanan "Zirə"nin bu oyunun da favoriti olduğu hər kəsə məlum idi.

"Football-plus.az" xəbər verir ki, oyun başlayan kimi nominal qonaqlar hücuma atıldı. Heç iki dəqiqə tamamlanmamışdı ki, Eldar Quliyev uzaqdan gözəl zərbə ilə hesabı açmağa çalışdı. Ancaq Səlahət Ağayev yerində idi. 16-cı dəqiqədə “qartallar” nümunəvi hücum sonucunda hesabı açdı. Zebli – Sadıxov – Suma hücumunu sonuncu cərimə meydançasının xətti üzərindən dəqiq zərbə ilə bitirdi. Qoldan sonra “dənizçilər” bir qədər fəallaşdı. Hesab isə düşünülmüş hücum zamanı yox, adi bir səhv üzündən bərabərləşdi. Valdemarın cərimə meydançasının qarşısını almaq istəyən Məqsəd topu elə nöqtəyə qaytardı ki, Luqasi, sadəcə, onu qapıya göndərdi.

2-ci hissənin əvvəlində Rəhim rəqibin bir neçə oyunçusunu məşğul edəndən sonra qapıya zərbə vurdu. Amma müdafiəçi topu boş qapıdan çıxardı. Artıq oyun qarşılıqlı hücumlarla müşayiət olunurdu. Hətta “Səbail” rəqiblə müqayisədə daha təhlükəli hücumlar qururdu. Sadəcə, son nöqtəni qoyan tapılmırdı. Hiss olunurdu ki, kim qol vursa, o da qalib gələcək. Bu mübahisənin əllinə Rəşad Sadıqovla Nir Bardea müdaxilə etdi. “Zirə”nin baş məşqçisi komandaya gəldiyi gündən zədələrin əlində əsir-yesir olan Paxtmanı meydana buraxdı, “Səbail”in müdafiəçisi isə heç bir təhlükə olmadığı məqamda topu İsmayıl İbrahimliyə “bağışladı”. İsmayıldan ötürmə alan Paxtman Səhatin uzana bilməyəcəyi nöqtəyə zərbə vurmaqla komandasına qələbə qazandırdı. Yeri gəlmişkən, Paxtman cəmi bir dəqiqə sonra fərqi artıra da bilərdi. “Səbail” sona qədər çox çalışsa da, hesabı bərabərləşdirməyi bacarmadı. Son hücumda hətta Səlahət də rəqib qapısına zərbə endirməyə imkan tapdı…

Gözdən qaçmadı
* Oyunu izləyənlər arasında yığmanın köməkçi məşqçisi Arif Əsədov da var idi.
* Şahin Diniyev topdaşıyan uşaqları bir-bir salamladı.
* 21-ci dəqiqədə "Zirə" azarkeşləri "Rəşad Sadıqov" şüarını səsləndirdilər. Baş məşqçi bunun qarşılığında fanatlara əl işarəsi ilə təşəkkür etdi.