Gözlənildiyi kimi, “Qarabağ” oyuna fəal başladı. Ağdamlılar ilk dəqiqələrdən hücuma atıldı.

6-cı dəqiqədə Yankoviçin cərimə zərbəsindən vurduğu top qapı dirəyindən döndü. Qonaqlar qol istəyinə 21-ci dəqiqədə çatdı. Cəfərquliyevin ötürməsini Andrade qolla tamamladı. Çox keçmədən çempionatın bombardiri Juninyo səhnəyə çıxdı – 2:0. Az sonra Zubir Bayramovun cinahdan ötürdüyü topu tora qovuşdurdu. İlk hissədə son nöqtəni isə meydan sahibləri qoydu. Sorqa müdafiədə yaranan çaşqınlıqdan istifadə edərək fərqi 2-yə endirdi.

İkinci yarı da eyni ssenari ilə başladı. Ağdamlılar 58-ci dəqiqədə hesab arasındakı fərqi yenidən 3 topa çatdırdı. Bu dəfə Benzya adını tabloya yazdırdı. Təxminən 20 dəqiqə sonra Andrade dublunu rəsmiləşdirdi. Matçda son nöqtəni isə Keyta qoydu. O, Bayramovun ötürməsini qolla tamamlayaraq yekun nəticəni müəyyənləşdirdi – 1:6. Yaxşı ki Samir Abasov oyunu ehtiyat oyunçular skamyasından yox, tribunadan izləyirdi. Yoxsa dözə bilməz, enində-sonunda özünü meydana atardı. Beləliklə, ilk dövrədə olduğu kimi, yenə rəqibini 5 top fərqi ilə məğlub edən “Qarabağ” liderliyini davam etdirdi.

Gözdən qaçmadı
* “Qarabağ”ın azarkeş qrupları tribunada həmişəki yerini almışdı. “Kimyaçılar” da ənənəvi yerində idi.
* “Sumqayıt” fanatları matçboyu “Zirə”nin qardaşı “Qarabağ” Ağdam” şüarını səsləndirirdi. Hərçənd 1:6 uduzan komandanın azarkeşlərinin belə deməyə nə dərəcədə haqqı çatırdı – bu başqa məsələ... Rəqib iki oyunda sənin komandanın qapısından 11 top keçirirsə, başqa sözə ehtiyac varmı?!

İSMAYIL XEYRULLAYEV