Komandalar son 4 gündə 2-ci dəfə qarşılaşdı.

Premyer-liqanın 17-ci turunda səfərdə "boz qurd"a 0:1 uduzan "qartallar" bu dəfə tovuzluları məğlub etmək istəyirdi. Amma oyuna qonaqlar fəal başladı və bunun məntiqi nəticəsi kimi artıq 4-cü dəqiqədə Ayxanın qapı önünə ötürməsinə Con ayaq qoymaqla hesabı açdı. Qoldan sonra da qonaqlar “müdafiədə oturmadı”. Ayxanın növbəti asmasına Miller zərbə endirsə də, hədəfə düşə bilmədi. İrəliləyən dəqiqələrdə "qartallar"dan Çantakiasın baş zərbəsi qapının üstündən keçdi. 31-ci dəqiqədə Rəhim cərimə meydançasının kənarından qüvvətıi zərbəylə “9-luğ”u dəqiq nişan aldı. Zirəlilər qolu bayram etdiyi vaxtda VAR-dan müdaxilə gəldi. Ofsayd epizoduna görə qol qeydə alınmadı. Qalan vaxtda mübarizə əsasən meydanın mərkəzində getdi. 2-ci hissənin əvvəli top uğrunda mübarizədə keçdi. 51-ci dəqiqədə qonaqlar yüzfaizlik qol imkanını boşa verdi. Con qapıçıyla təkbətək çıxsa da, büdrədi, bir qədər sonra onun zərbə vurmasına imkan verilmədi. Növbəti epizodda Marandici fərdi ustalıq sayəsində üç rəqib futbolçunu aldatsa da, zərbəsi bərbad alındı. 82-ci dəqiqədə Qismət - Rəhim - Paxtman “üçlüy”ünün təşkil etdiyi hücumda “sambaçı” topu tora göndərdi. Qoldan ruhlanan Rəşad Sadıqovun komandası hücumları davam etdirdi. 89-cu dəqiqədə Cibrila cinahla reyd etdikdən sonra cərimə meydançasındakı Rüstəmi gördü. "11 nömrə" dəqiq zərbəylə tablodakı rəqəmlərdən birini dəyişdi. Tovuzlular uzatma dəqiqələrində hesabı bərabərləşdirmək üçün irəli atılsa da, bundan bir nəticə hasil olmadı. Hakimin final fiti tovuzluları kubokdan kənarda qoydu.

Gözdən qaçmadı
* Jurnalistlərə təqdim olunan protokolda VAR hakimi və köməkçisi qeyd olunmamışdı.
* Zirəyə iki dolu avtobus tovuzlu azarkeş gəlmişdi.
* Oyunu izləyənlər arasında "Araz-Naxçıvan"ın baş məşqçisi Azər Bağırov da var idi.

ABDULLA İSMAYILOĞLU