"Qartallar" çoxlarının gözləmədiyi halda mövsümə uğurlu başlayaraq geridə qalan 3 turda maksimum xal toplamaqla turnir cədvəlində liderliyə yiyələnmişdi. Odu ki, onlar uğurlarını davam etdirməyi hədəfləyirdi.

Qonaqlar isə "Neftçi" ilə heç-heçənin ardından qəsəbəyə qələbə əzmiylə gəlmişdi. Oyunun gərgin keçəcəyi əvvəlcədən bəlli idi. Meydan sahibləri oyuna fəal başladılar. Artıq 2-ci dəqiqə Rüstəm gözəl ötürmə ilə Kulaçı “gördü”, sonuncu da dəqiq zərbəylə hesabı açdı. Qonaqlar buna 8-ci dəqiqədə Anatolinin cərimə zərbəsiylə cavab versə də, hədəfə düşə bilmədi. Alekseyin cəhdi də uğursuz oldu. Çantakiasın cərimə zərbəsi isə dirəkdən qayıtdı. "Zirə"fasiləyə üstün yollandı.

"Sabah" 2-ci yarıya dəyişikliklərlə başlamaqla qol axtarışında olduğunu bəyan etdi. "Bayquşlar" üstün başladı. Alekseyin qapı önünə asmasına Volkov ayaq qoysa da, zərbəsi zəif alındı və qapıçı üçün topu tutmaq çətin olmadı. Amma "qartallar" olduqca sıx oynayaraq rəqibə boşluq vermirdi. Ona görə də mübarizə əsasən meydanın mərkəzində getdi. "Sabah" ən real qol imkanını 76-cı dəqiqədə qaçırdı. Marqarita gözəl ötürməylə Volkovu zərbə mövqeyinə çıxarsa da, gürcünün zərbəsi dirəkdən qayıtdı. Qarşıdakı dəqiqələrdə Məqsədin zərbəsi qapının üstündən keçdi. Oyuna əlavə olunan dəqiqələrdə də "77 nömrə" diqqət mərkəzinə düşdü. Onun növbəti həmləsini qolkiper zərərsizləşdirdi. Son dəqiqələrdə "bayquşlar" böyük qüvvə ilə irəli atılsa da, qol vəziyyəti yarada bilmədi. Hakimin final fiti "Zirə"nin ardıcıl 4-cü qələbəsini, "Sabah"ın isə mövsümdə ilk məğlubiyyətini rəsmləşdirdi. 

Gözdən qaçmadı 
* Masazırdan gələn 60 azarkeş “Sabah”ı dəstəksiz qoymamışdı.
* Oyundan əvvəl Şəhriyar Rəhimovun xatirəsi birdəqiqəlik sükutla yad edildi. Həmçinin "Qartallar" azarkeş qrupu mərhum futbolçunun şəklini qaldırdı. Kulaç da sevincini vaxtilə "Zirə"də oynamış mərhum futbolçunun 13 nömrəli formasını nümayiş etdirməklə bölüşdü. 
* Oyunu izləyənlər arasında "Sabah"a keçidi gözlənilən Ayaz Quliyev, eləcə də yığmanın baş məşqçisi Canni de Byazi, köməkçisi Arif Əsədov da var idi. 
* Hakimin final fitindən sonra tribunaya toplaşan azarkeşlər "Rəşad, Rəşad" şüarlarını səsləndirdi. Baş məşqçi isə onlara təşəkkürünü bildirdi. 
* “Zirə”nin futbolçuları qələbəni azarkeşlərlə birgə qeyd etdi. Təcrübəli qapıçı Anar Nəzirov da klub bayrağını dalğalandırırdı