Tovuzlular ötən tur səfərdə "Neftçi"yə qarşı yaxşı döyüşsə də, sonda məğlub olmuşdu.

“Zirə" isə son 3 oyunda qələbəyə həsrət qalmışdı. "Qartallar" 2-ci pillədəki mövqeyini bir qədər də möhkəmlətmək üçün Tovuz səfərindən ən azı 1 xalla ayrılmalıydı. Komandalar oyuna ehtiyatlı başladı. İlk 10 dəqiqədə mübarizə meydanın mərkəzində getdi. Conun iti bucaqdan zərbəsini qapıçı dəf etdi. Bir qədər sonra nigeriyalı Ayxanı zərbə mövqeyinə çıxarsa da, sonuncu hədəfə düşə bilmədi. Conun növbəti cəhdi bərbad alındı. 37-ci dəqiqədə Ayxanın cərimə meydançasına ötürməsinə Şəhriyar yüksəlib zərbə endirsə də, qapıçı topu tutdu. Bir qədər sonra ofsayd bayrağı da qalxdı. Meydan sahibləri şansları dəyərləndirə bilmədikdən sonra qonaqların hücumları başladı. Təcrübəli Kamalı iş başında gördük. Qolkiper həm Məqsədin, həm də Qismətin sevinməsinə imkan vermədi. 41-ci dəqiqədə Marandiçinin zərbəsinə isə Renato ayaq qoydu. Beləliklə, tərəflər fasiləyə “sülh”lə yollandı. 2-ci yarıda da komandalar daha çox topa sahib olmaq uğrunda mübarizə apardı. 76-cı dəqiqədə Veysəl meydanın özlərinə aid hissəsində topa ələ keçirib Fəridə ötürdü. "77 nömrə" mərkəzdən sütətlə irəliləyərək qarşısıalınmaz zərbəylə tablodakı 0-lardan birini pozdu və tribunadakıları ayağa qaldırdı. Qoldan sonra qəsəbə təmsilçisi “1 nömrə” kimi oynamağa çalışdı. Kulaç yaxın məsafədən topu qapıya göndərə bilmədi. Runanın baş zərbəsi isə dirəyin yanından keçdi. Oyuna əlavə olunan dəqiqələrdə Cibrila da şansını boşa verdi. Hakimin final fiti tovuzluların qələbəsini, "qartallar"ın məğlubiyyətini rəsmləşdirdi. Bununla da Rəşad Sadıqovun komandasının qələbəsiz oyunlar seriyası 4-ə çatdı.

Gözdən qaçmadı
* Oyunu izləmək üçün 40 zirəli fanat da gəlmişdi. Oyunu izləyənlər arasında Tovuzun icra başçısı da var idi.
* 34-cü dəqiqədə referi "Zirə"nin xeyrinə aut qərarı verərkən bütün tribuna ayağa qalxıb hakimin ünvanına tənqid və təhqir yağdırdı. Hətta tovuzlu azarkeşlərdən kimisə Elçin Məsiyevin üzünə lazer işığı saldı.
* 73-cü dəqiqədə Şəhriyar Əliyev köhnə zədəsindən dolayı ayağında ağrılar hiss etdiyinə görə davam edə bilməyərək əvəzləndi. Vitse-kapitan matçın 85-ci dəqiqəsindən etibarən oyunu ayaqüstə izləməklə yanaşı, azarkeşləri daha da çılğıncasına dəstək verməyə səsləyirdi. Oyuna əlavə olunan dəqiqələrdə isə Ayxan Abbasov oxşar jestlərlə fanatları coşdurdu.
* 89-cu dəqiqədə kapitanlar - Kamal ilə Qismət arasında qarşıdurma yarandı. Amma qalan futbolçular münaqişəni böyüməyə qoymadı.
* Bruno Qonçalves el havasının sədası altında azarkeşlər qarşısında rəqs etdi

ABDULLA İSMAYILOĞLU