Premyer-liqanın 24-cü turunu geridə qoyduq. Qış fasiləsindən sonra bəlkə də ilk dəfə idi ki, hakimlik ön plana çıxmadı. Buna baxmayaraq, çatışmazlıqlar yenə var idi. Xüsusilə “Səbail” – “Qəbələ” matçında meydan sahiblərinin qapısına verilməyən, qonaqlar tərəfindən penalti kimi dəyərləndirilən epizodu qeyd etmək olar.

Turan Tovuz - Zirə, RAUF ALLAHVERDİYEV

Görüşün sakit məcrada keçdiyini söyləyə bilərik. Göstərilən vərəqələr və verilən qərarlar doğru idi. Sadəcə, yan xətt hakimləri Rauf Allahverdiyevə kömək etməkdə çətinlik çəkirdi. Köməkçilər bəzi məqamlarda qərar verməkdə gecikirdi. Oyunda hakimliklə bağlı başqa hansısa problem yaşanmadı.

Şamaxı – Sabah, KAMRANBƏY RƏHİMOV

Oyunun ilk hissəsinin qol epizodları baxımından kasad olduğunu və mübarizənin əsasən meydanın mərkəzində getdiyini nəzərə alsaq, hakimin üzərinə böyük yük düşmədi. Lakin fasilədən sonra vəziyyət dəyişdi. Rəhimov daha çox diqət mərkəzinə düşürdü. İlk hissədə ədalət təmsilçisi heç bir futbolçuya rəsmi xəbərdarlıq etmədiyi halda, ikinci yarıda 5 dəfə əlini cibinə atdı. Göstərdiyi sarı vərəqələrin hər biri yerində idi. Baş hakimin 2-ci hissəyə əlavə olunan 4-cü dəqiqədə qonaqların qapısına penalti təyin etməsi də düzgün qərar idi.

Səbail – Qəbələ, CAVİD CƏLİLOV

Qarşılaşmanın startından baş hakim mubarizəli oyuna açıq olduğunu göstərdi. Hər sərt hərəkətə, çiyin-çiyinə mübarizə nəticəsində yerdə qalan futbolçuya görə matçı saxlamırdı. Oyun zamanı mübahisəyə açıq epizod 56-cı dəqiqəyə təsadüf etdi. Ramon Maçadonun zərbəsindən sonra top aşkar şəkildə Maksim Çexin əlinə dəyərək istiqamətini dəyişdi. Lakin ədalət təmsilçisi qayda pozuntusunun olmadığını bildirərək oyunu davam etdirdi. Bundan yararlanan meydan sahibləri hücumlarını davam etdirərək, "Qəbələ"nin qapısına yol tapdı. Qonaqların məşqçilər korpusu və futbolçular nə qədər VAR-a baxmaq üçün dil töksələr də, baş hakim qərarını qüvvədə saxladı. Matçboyu cəmi iki dəfə əlini cibinə atdı ki, bu da 53-cü və 89-cu dəqiqəyə təsadüf etdi. Amma bu qərarlarında haqlı idi.

Sumqayıt – Kəpəz, ELÇİN MƏSİYEV

Turnir cədvəlinin ikinici “beşliy”ndə yer alan komandaların oyununun gərgin məcrada keçəcəyi güman olunsa da, hakimlər briqadası üçün bu matçı idarə etmək çətin olmadı. Düzdü, Məsiyev ümumilikdə hər iki komandanın üzvlərinə 7 sarı vərəqə göstərdi. Ancaq oyunun korrekt keçdiyini vurğulmaq lazımdı. FİFA referisinin ilk dəqiqədən sona qədər oyunun “ipi”ni əldən vermədiyini, narazılıq doğuran, mübahisəyə səbəb olacaq qərarlar vermədiyini vurğulamaq lazımdı. Bir sözlə, Məsiyev işinin öhdəsindən gəldi.

Neftçi – Qarabağ, RƏŞAD ƏHMƏDOV

Azərbaycan derbisini maraqlı edən iki məqam var idi: duman və hakim. Referi qərarlarında olduqca qətiyyətli idi. Xırda follara görə tez-tez fit səsləndirmirdi. Futbolçular arasındakı münaqişələrə dərhal müdaxilə edir və böyüməsinə imkan vermirdi. "Neftçi"nin fərqləndiyi epizodda "Qarabağ"ın baş məşqçisi Qurban Qurbanov oyundankənar vəziyyət olduğunu iddia etsə də, təkrara baxdıqda topun qaydalar çərçivəsində vurulduğu görünür. Beləliklə, Rəşad Əhmədovun oyunu yaxşı idarə etdiyini söyləyə bilərik.