Premyer-liqada 13-cü turun ümumilikdə səliqəli keçdiyini deyə bilərik. 5 oyunda 21 sarı vərəqə göstərildi, futbolçulardan heç biri hakimin “qırmızı üzünü görmədi”.

İdarəçiliklə bağlı fikirlərə gəlincə, yalnız “Qəbələ”nin baş məşqçisi Elmar Baxşıyev Elçin Məsiyevdən kəskin şəkildə narazılıq etdi. Qalan oyunlarda hakimlik müzakirə mövzusu deyildi.

Araz-Naxçıvan – Kəpəz, RƏŞAD ƏHMƏDOV
Matçda ilk sarı vərəqə 37-ci dəqiqədə Numan Kurdiçə qarşı kobudluq edən Latir Fala göstərildi. 69-cu dəqiqədə isə Nuno Rodriges hakimə qarşı kəskin şəkildə etiraz etdiyinə görə vərəqə ilə cəzalandı. O, topun “Kəpəz”in futbolçusundan çıxdığını iddia edirdi. Epizodun təkrarına baxanda naxçıvanlıların oyunçusunun boşuna etiraz etmədiyini gördük. 82-ci dəqiqədə Onanuqa əvəzləndiyi epizdodda hakimin israrına baxmayaraq, meydanı gec tərk etdiyi üçün “sarı”sını aldı. Elçin Əlicanov 84-cü dəqiqədə Rodrigesə qarşı kobudluğa görə haqlı şəkildə cəzalandı. 90+3-cü dəqiqədə İqor Ribeyro Elmir Tağıyevə qarşı bilərəkdəın kobudluq etdiyi üçün Rəşad Əhmədov tərəfindən bağışlanmadı. Hakimin bir epizoddakı səhv qərarını nəzərə almasaq, matçı normal idarə etdi.

Neftçi – Sumqayıt, RAUF CABBAROV
“Neftçi Arena”dakı matçın yetərincə gərgin keçəcəyi bəlli idi. Ədalət təmsilçisi əksəriyyətin səbrsizliklə gözlədiyi oyunda 11 vərəqə ilə yadda qaldı. Daha dəqiq desək, Cabbarov həm futbolçuları, həm də məşqçilər korpusunu cəzalandırdı. Buna səbəb görüşün daha çox emosional davranışlarla müşayiət olunması idi. Hər iki komanda oyunboyu ciddi olmasa da, qayda pozuntularına yol verdi. Referi özünü soyuqqanlı aparıb hadisələrə vaxtında müdaxilə etməyi bacardı. Oyunun, demək olar ki, gözlənilməz nəticəylə bitməsi rəsmi şəxslər və futbolçular arasında mübahisələrə də yol açdı. Hakim burda da lazımi qərarlar verməkdən çəkinmədi. Kiminsə referidən narazı qaldığını demək mümkün deyil. Sadəcə, Samir Abasov ikinci hissəyə 5 dəqiqə artırılmasına etiraz etdi ki, bu da anlaşılmazdı. Ümumiyyətlə, Cabbarov sınaqdan üzüağ çıxdı.

Turan Tovuz – Sabah, ƏLİYAR AĞAYEV
Oyun gərgin mübarizə şəraitində keçdi. Tovuzda sərt oyuna şahidlik etsək də, qırmızı vərəqə qeydə alınmadı. İlk hissəsində 5 qol vurulan matçın baş hakimi Əliyar Ağayev oyuna tam nəzarət edirdi. Referi 4-cü dəqiqədə meydan sahiblərinin qolunu oyundankənar vəziyyət kimi qiymətləndirdi. Hissənin ortalarında Ağayev qonaqların qapısına heç bir tərəddüdsüz penalti təyin etdi. İlk baxışdan ikili mübarizəyə bənzəyən epizodun videotəkrarına baxdıqda FİFA referisinin doğru qərar verdiyi – Kahim Parrisin Denis Marandiçinin ayağına zərbə endirdiyi göründü. Beynəlxalq dərəcəli hakim matçı ideal idarə etdi.

Zirə – Qəbələ, ELÇİN MƏSİYEV
İlk yarı Elçin Məsiyev üçün rahat keçdi. Amma referinin fasilədən sonrakı bəzi qərarları müzakirəyə açıq ola bilər. 58-ci dəqiqədə Salifu Suma sağ cinahda cərimə zərbəsini yerinə yetirərkən top “canlı sədd” quran iki oyunçudan biririn – Yaovi Akakponun əlinə dəydi.
Referi epizodla bağlı öncə tərəddüd etdi. Bu da meydan sahiblərinin etirazına səbəb oldu. VAR otağında uzun-uzadı müzakirə getdi. Nəhayət, siqnal gələndən sonra Elçin Məsiyev epizodu dəyərləndirmək üçün monitora yaxınlaşdı. Dəqiqləşdirmədən sonra referi penalti nöqtəsini göstərdi. Bu epizoda görə oyun 5 dəqiqə dayandı. 66-cı dəqiqədə Pyer Zebli Yaoviyə qarşı sərt oynasa da, referi fit çalmadı. Bu da "qırmızı-qaralar"ın etirazına səbəb oldu. 87-ci dəqiqədə qonaqlar hücuma çıxarkən "Zirə"nin cərimə meydançasında Ruan Renato ilə Osama Xalayla sərt şəkildə toqquşdu. 2-ci yerdə qaldı. "Qəbələ" penalti gözləsə də, VAR-dan qayda pozuntusu olmadığı deyildi. Elçin Məsiyev ancaq 2-ci hissədə əlini cibinə atdı. Üç sarı vərəqənin hamısı bölgə təmsilçisinin payına düşdü. Bəlkə də Baxşıyev oyun qaydalarının fərqli şəkildə təfsir olunduğunu deyərkən müəyyən mənada haqlıdı.

Qarabağ - Səbail, RƏVAN HƏMZƏZADƏ
İlk yarının "Qarabağ"ın üstünlüyü şəraitində keçməsi referinin işinə yaradı. Rəvan Həmzəzadə, demək olar ki, 45 dəqiqə ərzində görüşün idarəçiliyi ilə bağlı çətinlik yaşamadı. Düşünmək olardı ki, qonaqlar ikinci hissədə "Qarabağ"ın işini qəlizləşdirəcək. Lakin Juninyonun qolundan sonra "köhlən atlar" tam sakitləşdi. Hətta Pedro Nunonun hesab arasında fərqi azaltması da qarşılaşmanın gərginliyini artırmadı. Bir sözlə, şəkili referi "Qarabağ" - "Səbail" matçını ideala yaxın idarə etdi. Təbii ki, komandalar da bunda istəkli oldu. Rəvan Həmzəzadənin oyun ərzində yalnız bir sarı vərəqə göstərməsi də dediklərimizə sübutdu.