Misli premyer-liqasında hər oyunda orta hesabla 5 qolun vurulduğu start turunda hakimliklə bağlı ciddi münaqişə yaşanmadı.

"Football-plus.az" xəbər verir ki, 20 sarı vərəqənin (biri “Neftçi”nin rumıniyalı məşqçisinə) göstərildiyi turda meydandan qovulan olmadı. “Səbail” – “Sumqayıt” və “Kəpəz” – “Neftçi” oyunlarında verilən penalti qərarlarını dartışmaq da çətindi. Gəncədəki penalti hər nə qədər bəsit görünsə də, Tural Qurbanov qaydalara uyğun davrandı.

Qarabağ - Zirə, ƏLİYAR AĞAYEV
Ölkənin ən statuslu hakimi mübahisəli qərarla yadda qalmadı. 4 sarı vərəqənin hər birini qeyri-idman hərəkətinə görə göstərdi. Artıq ilk yarıda Bədavi Hüseynova şifahi xəbərdarlıq etdiyindən 47-ci dəqiqədə Rüstəm Əhmədzadə yerdə qalarkən müdafiəçi haqlı sarı vərəqə ilə cəzalandırıldı. Yeganə qolun müəllifi Dmitrios Çantakisi də “yerində oturtmağı” lazım bildi. Yunan futbolçu 87-ci dəqiqədə zədələndiyi halda meydandan çıxmadığına görə hakimin qəzəbinə tuş gəldi.

Sabah – Qəbələ, CAVİD CƏLİLOV
İki yorğun komandanın dinamik oyununu izlədik. Ədalət təmsilçisi xeyli təzyiqlə üzləşdi. Elmar Baxşıyevlə Murad Musayev tez-tez ondan narazılıq edirdi. Təəccüblüdü ki, səbəb eyni idi – matçın tez-tez dayandırılması. Cəlilovun müntəzəm fitini səsləndirməsi çalışdırıcıları bezdirmişdi. Düzdü, qayda pozuntusu varsa, dayanmaq labüddü. Amma hakim ən kiçik güzəşt belə etmədi. Çanaq isə 38-ci dəqiqədə növbəti dəfə hakimin qərarına etiraz edən “Qəbələ”nin futbolçusu Urfan Abbasovun başında çatladı. Kapitan “Sabah”ın qapısı yaxınlığında rəqiblə mübarizə apararkən fitin səslənməsi ilə razılaşmadığından hakimə narazılıq etdi. Cəlilovun tərəddüdsüz cəzası isə anlaşılan deyil. Mikelsin 64-cü dəqiqədə vurduğu qol da sayılmadı. Çünki yan xətt hakimi ofsayd bayrağını qaldırmışdı. VAR onun qərarını təsdiqlədi. Ümumilikdə “Qəbələ” ədalət təmsilçisindən narazı qaldı.

Səbail – Sumqayıt, ELÇİN MƏSİYEV
Oyunun gərgin keçəcəyi əvvəlcədən gözlənilirdi. Çünki "Səbail" mövsümə doğma meydanda qələbəylə başlamağı, "Sumqayıt" isə sərfəli nəticəylə dönməyi düşünürdü. Referi ilk dəqiqələrdən tempin aşağı düşməməsi üçün çalışdı, hər sərt epizoda görə fitini səsləndirmədi. Lakin "kimyaçılar"ın hesabı açmasıyla hakim daha çox diqqət mərkəzinə düşdü. Əsasən də fasilədən sonra. 63-cü dəqiqədə "Sumqayıt"ın cərimə meydançasında Ağabala ilə Rövlanın qarşıdurmasında 1-ci yerdə qaldı. Amma referi penalti vermədi, həm "Səbail"in futbolçularının, həm də məşqçilərinin kəskin etirazı ilə qarşılaşdı. Cəmi 1 dəqiqə sonra, demək olar ki, oxşar epizodda Adil Rövlana qarşı kobud oynadı və hakim “nöqtə”ni göstərdi. Bu qərar da "dənizçilər"in, əsasən də kapitan Ağabalanın referiyə etirazıyla nəticələndi. Ardıcıl qollar buraxmaq meydan sahibi futbolularda emosiyaları artırırdı. Bunun nəticəsidi ki, tez-tez rəqib futbolçular arasında qarşıdurma yaranırdı. Ona görə də referi tez-tez əlini cibinə atmalı olurdu. Oyunda göstərilən vərəqələr yerində idi. "Sumqayıt" 3-cü qolu vuran zaman da referi diqqət mərkəzinə düşdü. Belə ki, Kamran Quliyev topu tora göndərdikdən sonda laysman baytağını qaldırdı. Elçin Məsiyev ofsaydı qeydə alsa da, VAR otağından müdaxilədən sonra qərarını dəyişdi və qolun qaydalar çərçivəsində vurulduğu bildirildi. Matça əlavə olunan dəqiqələrdə Mossi Səlahət Ağayevi məyus etsə də, hakim qolu qeydə almadı. Ardınca VAR otağından gələn qərarla onun haqlı olduğu təsdiq olundu. Gərgin və məhsuldar oyunda hakimlər briqadası işinin öhdəsindən gəldi.

Araz-Naxçıvan - Turan Tovuz, İNQİLAB MƏMMƏDOV,
Premyer-liqanın açılış matçı qaydalar çərçivəsində keçdi, ciddi qayda pozuntusu olmadı. Sadəcə, xırda səhvlər gözə çarpırdı. İnqilab Məmmədov oyunu, demək olar ki, ideala yaxın idarə etdi. Hakimlərin təlim-məşq toplanışı keçməməsi onların işinə təsir etmədi. 2022/23 mövsümünə görə "Tofiq Bəhramov" mükafatına sahib olan Məmmədov bu görüşün öhdəsindən layiqincə gəldi

Kəpəz – Neftçi, TURAL QURBANOV
Oyundan öncə çoxları düşünülürdü ki, bu görüşü idarə etmək Tural Qurbanov üçün o qədər də asan olmayacaq. Çünki tarixi derbidə hakimlik etmək çətindi. Lakin Qurbanov işinin öhdəsindən gəldi. Ən qəliz qərar penalti ilə bağlı idi. Hakim bu məqamda haqli qərar verdi. Gənc "fit sahibi"nin Gəncədəki matçı ideala yaxın idarə etdiyini söyləyə bilərik.