Misli premyer-liqasının 7-ci turu bir-birindən maraqlı oyunlarla yadda qaldı.

Hakimlər 5 matçda futbolçuları ümumilikdə 23 dəfə cəzalandırdı. Vərəqələrdən 20-si “sarı”, 2-si birbaşa, 1-i isə ikinci “sarı”dan sonra verilən “qırmızı” oldu. Turun ən kobud komandası “Kəpəz”di. Gəncəlilərin 7 futbolçusu “Şamaxı” ilə oyunda sarı vərəqə ilə cəzalandırıldı. “Qəbələ” də 7-ci turun kobud komandası kimi yadda qaldı. “Qırmızı-qaralar”ın 3 futbolçusu “sarı” aldısa, 1-i də birbaşa “qırmızı” ilə meydandan kənarlaşdırıldı. Ən nümunəvi komandalar “Sabah”, “Səbail”, “Neftçi” və “Qarabağ”dı. Bu komandaların yalnız hərəyə 1 futbolçusu sarı vərəqə alıb. Reportyorlarımızın qeydlərinə keçid alaq.

Zirə - Qarabağ, RƏŞAD ƏHMƏDOV
Oyun məhsuldar alınsa da, Rəşad Əhmədovun idarəçiliyində ciddi problem yox idi. Sadəcə, sonda “Qarabağ”ın 7-ci qolunun oyundankənar vəziyyətdən vurulması şübhə doğurdu. Lakin referi VAR-a da baxandan sonra Musa Qurbanlının pokerini qaydalar çərçivəsində rəsmiləşdirdiyini bildirdi. Demək olar ki, bütün epizodlara yaxın olan baş hakimin nəticəyə təsir edən ciddi səhvi olmadı.

Səbail - Neftçi, ƏLİYAR AĞAYEV
Derbidə qalmaqallı epizodlar yaşandı. Oyunu ölkənin ən yaxşısı sayılan Əliyar Ağayev idarə etsə də, hakimlik baxımından problem çox oldu. İlk şübhəli epizod 43-cü dəqiqədə baş verdi. Fakundo Kardoso yerdə qalan Mamadu Mboca qarşı kobudluq etsə də, Ağayev oyunu davam etdirdi. FİFA referisi VAR-da epizodu izləsə də, qərarı dəyişmədi. Lakin təkrara baxanda Fakundonun kobud oynadığı aşkar görünür. Ümumiyyətlə, Əliyar bəy son turlarda özünü yaxşı tərəfdən göstərə bilmir. Bu oyunda da FİFA referisi və briqadası “ənənəyə sadiq qaldı”.

Sabah - Turan Tovuz, RAUF CABBAROV
7-ci turun açılış matçı Rauf Cabbarova həvalə olunmuşdu. Məhsuldar və meydan sahiblərinin üstünlüyü şəraitində keçən qarşılaşmada referi tempi maksimum saxlamağa çalışdı, lazımsız follara görə oyunu saxlamadı. Cabbarov iki dəfə diqqət mərkəzinə düşdü. 36-cı dəqiqədə VAR-a müraciət edəndən sonra "Turan Tovuz"un futbolçusu Şakir Seyidova qırmızı vərəqə göstərəndə, bir də uzatma dəqiqələrində qonaqların qapısına penalti təyin edəndə. Hakimin hər iki qərarı doğru idi.

Kəpəz - Şamaxı, NİCAT İSMAYILLI
Autsayderlərin oyununda sürət o qədər yüksək olmadığından Nicat İsmayıllının üzərinə çox iş düşmədi. Gənc referi oyunboyu hadisələrin mərkəzinə yaxın olmağa çalışırdı. Laysmanlarla anlaşma da istənilən səviyyədə idi. Bu üzdən heç bir komandanın baş məşqçisi matçdan sonra keçirilən mətbuat konfransında hakimliklə bağlı narazılıq bildirmədi.

Qəbələ - Sumqayıt, ELÇİN MƏSİYEV
FİFA referisi matç ərzində yaşanan yeganə mübahisəli epizodda düzgün qərar verdi. Söhbət Rövlan Muradovun 84-cü dəqiqədə meydandan qovulmasından gedir. Futbolçu hər nə qədər yerə yıxılarkən “bilərəkdən rəqibin müdafiəçisini vurmadım” desə də, epizodun təkrarına baxanda onun həmin anda Todor Todorskinin baldırına zərbə vurduğu görünür.