Misli premyer-liqasının 14-cü turunu da geridə qoyduq. Bu tur da yetərincə maraqlı və dramatik oyunlarla yadda qaldı. Hakimlər ümumilikdə 18 dəfə əlini cibinə atmağa məcbur oldu. Turun ən kobud komandaları “Qəbələ” ilə “Turan Tovuz”du. Hər birinin 4 futbolçusu sarı vərəqə ilə cəzalandı. Ən intizamlı kollektivlər isə “Şamaxı”, “Kəpəz” və “Qarabağ”dı. Bu komandaların heç bir futbolçusu hakimin qəzəbinə tuş gəlmədi. Reportyorlarımızın qeydlərinə keçid alaq.
Zirə - Səbail, VÜQAR HƏSƏNLİ
Qarşılaşma yetərincə gərgin alındı. Amma oyun ərzində qol vəziyyətlərinin sayı o qədər də çox olmadı. Bu üzdən Vüqar Həsənlinin üzərinə böyük düşmədi. Baş hakim VAR-a da müraciət etmədi. Odu ki, ədalət təmsilçiləri matçı normal idarə etdi, ciddi qüsurları gözə dəymədi.
Neftçi – Qəbələ, NİCAT İSMAYILLI
Matç ərzində mübahisəli, hakimin qərarının narazılıq doğuran məqamlar olmadı. 36-cı dəqiqədə “Neftçi”nin hücumundan sonra topun “Qəbələ”nin müdafiəçisinin əlinə dəydiyi iddia olundu. VAR-dan gələn göstərişdən sonra isə referi qapıdan zərbə qərarı verdi. Demək olar ki, meydanda başqa mübahisəli vəziyyət yaşanmadı. Nicat İsmayıllı oyunu nəticəyə təsir edəcək qərarlar vermədən idarə etdi.
Kəpəz - Turan Tovuz, RƏŞAD ƏHMƏDOV
Qərb derbisini Rəşad Əhmədovun idarə etməsi təsadüfi deyildi. Mingəçevirdən olan hakim oyunun “ip”ini əlinə ala bildi. İlk hissəsinin ortalarında Tural Axundovla Ehtiram Şahverdiyev arasındakı gərginliyin qarşısını aldı. Ümumiyyətlə, görüşdə bundan başqa problem yaşanmadı. Baş məşqçilərin matçdan sonra idarəçiliklə bağlı açıqlama verməməsi də Rəşad Əhmədovun hesabına yazılan məqam sayılmalıdı.
Şamaxı - Sumqayıt, ELÇİN MƏSİYEV
İlk baxışdan məhsuldar oyunun həm də gərgin məcrada keçdiyini düşünmək mümkündü. Ancaq turun açılış oyununu idarə etmək Elçin Məsiyevə problem yartmadı. Qonaqların ilk qolu ofsayddan vurduğu şübhəsi yaransa da, VAR hakimi Vüsal İsgəndərlinin həmin an oyundankənar vəziyyətdə olmadığını bildirdi. Meydan sahiblərinin 5-ci qolu ofsayddan vurduğunu da VAR hakimi Məsiyevə bildirdi. Bir sözlə, FİFA referisi matçı qüsursuz idarə etməklə yadda qaldı.
Sabah - Qarabağ, FƏRİD HACIYEV
Çoxları turun mərkəzi qarşılaşmasına təyinat alan Fərid Hacıyevin oyunun ağırlığını qaldıra biləcəyinə şübhə ilə yanaşırdı. Hər halda, meydanda hazırda 1-ci və 2-ci pillədə qərarlaşan komandalar üz-üzə gəlirdi. Ancaq gənc referi 90 dəqiqə boyunca meydanda özünü elə apardı ki, sanki çiynində illərin təcrübəsini daşıyır. Təsadüfi deyil ki, baş məşqçilər oyundan sonra idarəçiliklə bağlı irad bildirmədi.