"Kəpəz" ölkə kubokunda 1/8 finala çətinliklə çıxmışdı.

Gəncəlilər əvvəlki mərhələdə 2-ci liqanın liderlərindən "Baku Sportinq"lə 90 dəqiqə bacara bilməmiş, yalnız əlavə vaxtda iki qol vura bilmişdi. "Bayquşlar" isə turnirə yeni qoşulurdu. Maraqlı oyun olacağı gözlənilirdi. Hakimin start fitindən sonra qonaqlar oyuna fəal qoşuldu. 14-cü dəqiqədə Apehin ötürməni qəbul edən Til hesabı açdı. Meydan sahibləri bundan sonra irəli atıldı. Yusif ötürmə zamanı səhvə yol verdi, bu zaman topu oğurlayan Fati qapını yoxlasa da, top tirdən qayıtdı. 23-cü dəqiqədə Til – Apeh - Sekidika “üçlüy”ünün qurduğu hücumu sonuncu gözəl zərbə ilə bitirdi. 34-cü dəqiqədə "sarı-göylər"dən Elmirin zərbəsindən sonar top Ayazın əlinə dəydi. Hakim tərəddüd etmədən “nöqtə”ni göstərdi. Topa yaxınlaşan Niane tablodakı rəqəmləri dəyişdi. Hissənin sonları qarşılıqlı hücumlar şəratində keçdi. Çaklanın başla zərbəsi hədəfə düşmədi. 40-cı dəqiqədə Ayazdan ötürmə alan Apeh gözəl zərbəylə hesabı 1:3 etdi. 45-ci dəqiqədə isə Vüsalın cərimə meydançasına asmasına Niane yüksələrək yenidən fərqi minimuma endirdi. Fasilədən sonra "Kəpəz"in daha fəal oynayacağı gözlənilən idi. Amma 20 dəqiqəyə yaxın mübarizə meydanın mərkəzində getdi. Silvanın zərbəsi zamanı Rodriges seyvlə diqqət mərkəzinə düşdü. 76-cı dəqiqədə "Sabah"ın müdafiəsindəki boşluqdan yararlanan Papunaşvili Nianeyə assistentlik etdi, "26 nömrə" het-trikini rəsmləşdirdi. Hesab bərabərləşəndən sonra oyun yenidən canlandı. Parrisin hücumundan sonra top qapının üstündən keçdi. Nianenin 4-cü dəfə sevinməsinə Yusif imkan vermədi. Nəhayət, 89-cu dəqiqədə Amin “Sabah”ı növbəti mərhələyə daşıyan qolu vurdu.

Gözdən qaçmadı
* Oyunu izləyənlər arasında "Sabah"ın və yığmamızın sabiq üzvü, hazırda isə "Kür-Araz"da çıxış edən Cavid İmamverdiyev də vardı.
* İlk hissənin sonlarında Çakla ilə Vüsal arasında qarşıdurma yarandı. Referi hər birinə sarı vərəqə göstərməklə münaqişəyə son qoydu. Bu zaman futbolçusuna sarı vərəqə verilməsini ədalətsizlik sayan və rəqibə “qırmızı” tələb edən Murad Musayev də cəzalandı.