Adil Şükürovun gəlişindən həm daha məzmunlu oynayan, həm də xallar qazanan "sarı-göylər" bu matçdan da üzüağ çıxmaq istəyirdi.

Ötən tur evdə "Qarabağ" önündə darmadağın olan "Sumqayıt" isə Tovuz səfərindən qələbə ilə dönməyi hədəf götürmüşdü. “Kimyaçılar”ın son 3 oyunda qələbəyə həsrət qaldığını da xatırladaq.

Artıq 4-cü dəqiqədə Juniorun sürətli keçiddən sonra cərimə meydançasına asmasına Papunaşvili ayaq qoysa da, hədəfə düşə bilmədi. Qonaqların cavabı özünü çox gözlətmədi. Rövlanın qapı önünə ötürməsinə Kamran yükəslib zərbə endirsə də, top qapıdan yan keçdi. 20-ci dəqiqədə Rövlan bir qədər irəlilədikdən sonra cərimə meydançasındakı Ninqanı gördü. "11 nömrə" müdafiəçilərin başını gicəlləndirdirdi, amma zərbəsi dirəkdən qayıtdı. Bu zaman özünü yetirən Kehat toru silkələdi. Tədricən meydan sahibləri topu nəzarəti ələ alaraq rəqibi qapısına doğru sıxışdırmağa başladı. 42-ci dəqiqədə Kvirkviya cinahdan reyd etdikdən sonra topu cərimə meydançasına göndərdi, özünü yetirən Papunaşvili bərabərliyi təmin etdi.

2-ci yarıya "sarı-göylər" fəal başladı. Şakirin uzaqdan zərbəsi tirdən qayıtdı. Papunaşvili də yetərincə uzaq məsafədən qapını yoxlasa da, Mehdi son anda seyvlə qola “yox” dedi. Bir qədər sonra qolkiper gürcü futbolçunun iti bucaq altından zərbəsini də kornerə çıxardı. Gəncəlilər şansları qaçırdıqdan sonra "kimyaçılar" təşəbbüsü ələ aldı. Murata Sorqanı qapıçıyla üzbəüz qoysa da, estoniyalının zərbəsi dirəyin yanından keçdi. Kehatın zərbəsi zamanı isə Rodriges topu tutdu. Matçın sonlarında Papunaşvili qapını yoxlasa da, hədəfə düşə bilmədi. Hakimin final fiti “sülh”ü rəsmləşdirdi.

Gözdən qaçmadı
* Oyuna Sumqayıtdan 25-30 nəfərlik azarkeş qrupu gəlmişdi. Sayları az olsa da, səsləri ucadan gəlirdi.
* 83-cü dəqiqədə Cavad Kərimov əvəzlənərkən baş məşqçi Adil Şükürov gənc futbolçunu bağrına basdı.
* Matç bitəndən sonra "Sumqayıt"ın futbolçuları azarkeşlərinə tərəf getdi. Bu zaman fanatlar bənövşəyi petard yandırdı. Qonaq azarkeşlər "Samir Abasov, biz sənə inanırıq" şüarını səsləndirdi. Bunun cavabında gəncəli fanatlar "Adil, Adil" qışqırdı.
* Jurnalistlərə təqdim olunan protokolda "Sumqayıt"ı meydana kapitan kimi kimin çıxardığı qeyd olunmamışdı. Elə PFL-in oyunsonrası protokolunda da "kimyaçılar"ın kapitanı göstərilməmişdi.

ABDULLA İSMAYILOĞLU