“Rəqib ölkə futbolunun gözü sayılan “Qarabağ”dı” – Xankəndi ərəfəsində həyəcan?
Dekabrın 21-də Xankəndi stadionunda ölkə kubokunun 1/8 final mərhələsinin “Qarabağ” - MOİK oyunu keçiriləcək. Bir tərəfdə çempion, o biri tərəfdə 1-ci liqanın liderlərindən biri...
Bütün ölkənin Qurban Qurbanovun yetirmələrini aşkar favorit kimi gördüyü oyunla bağlı MOİK düşərgəsi nə düşünür? Sosial şəbəkələrdə yazılanlar futbolçuların motivasiyasına təsir edirmi, az qala uduzacağını bildiyin oyuna hazırlaşmaq çətin deyil ki?
“Football-plus.az” bu suallarla bağlı ordu klubunun baş məşqçisi Qəzənfər Abbasovun fikirlərini öyrəndi:
“Xeyr, heç bir çətinlik yoxdu. Əksinə, bizim üçün əlavə stimuldu ki, belə bir komandaya qarşı meydana çıxırıq. Futbolçularım nə bacarırlarsa, əllərindən gələnin ən yaxşısını edəcəklər ki, baxımlı futbol sərgiləsinlər”.
Mütəxəssis sensasiya edə biləcəklərini də dedi:
“Biz hər oyuna necə çıxırıqsa, bu oyuna da elə çıxacağıq. Rəqib ölkə futbolunun gözü sayılan “Qarabağ”dı. Lakin bu bizi qorxutmur. Əksinə, əlavə motivasiyadı. Mən inanıram ki, futbolçularım heç bir şeydən çəkinməyəcək və meydana qələbə qazanmaq üçün çıxacaqlar. Sensasiya qaçılmazdı. Hər şey ola bilər. Buna dünya futbolunun aparıcı liqalarında da şahid olmuşuq ki, 2-ci, hətta 3-cü liqa komandaları elita təmsilçilərinə qalib gəlib”.
Qəzənfər bəy PFL rəhbərliyinin bu gün qəzaya düşməsinə də toxundu:
“Bu arada bu gün bir acı xəbər də aldıq. PFL rəhbərliyi və işçiləri bu gün Ağdamda qəzaya düşüblər. Bu səbəbdən həm öz, həm də komandam adımdan yaralılara Allahdan şəfa diləyirəm. İnşallah, tez bir vaxtda sağalıb işlərinin başına dönərlər”.
MİRKAMAL KAZIMZADƏ
Digər xəbərlər
