Startı avqustun 18-də verilən Argentina Liqa Kubokunda (LK) ayın 26-29-u aralığında 2-ci turun oyunları keçirildi.

“Football-plus.az” xəbər verir ki, hələ ki iki matç keçirən komandalardan yalnız 4-ü xal itirməyib.

Xatırladaq ki, əsası 2020-ci ildə koronavirus pandemiyasının ölkədaxili yarışlara mənfi təsirlərini mümkün qədər aradan qaldırmaq üçün qoyulan turnirin 4-cü mövsümündə 28 komanda iştirak edəcək. Bu komandalar birdövrəli sistemlə iki qrupda yarışacaqlar. 14 turdan ibarət olacaq qrup mərhələsində ilk 4 yeri tutacaq komandalar 1/4 finala vəsiqə qazanacaqlar. Bu mərhələnin qalibləri daha sonra yarımfinala və finala çıxmaq üçün mübarizə aparacaqlar.

Yeni mövsümə səfərdə “Arxentinos Xuniors”a uduzmaqla (2:3) başlayan “River Pleyt” uğursuz startın acığını “Barrakas Sentral”dan çıxdı. Argentinanın son çempionu evdə bu rəqibinə heç bir şans vermədi. Amma qapısında ilk qolu görən tərəf məhz meydan sahibləri oldu. Onları 24-cü dəqiqədə Sepulveda oyuna mərkəzdən başlamağa vadar etdi. Hesabda geri düşən buenos ayreslilər qalan vaxtda, necə deyərlər, rəqibin daşını daş üstə qoymadılar. Təsadüfə bax ki, 37-ci dəqiqədə həmin Sepulveda komandasının arxa xəttinə kömək olmağa çalışarkən topu öz qapısına göndərdi. Hesabın bu şəkildə bərabərləşməsi qonaqlara psixoloji cəhətdən böyük zərbə oldu. Onlar ikinci hissədə “River”in daha 4 qolunun məyusluğunu yaşadılar. Darmadağına 69-cu dəqiqədə İnsuanın birbaşa qırmızı vərəqə ilə cəzalandırılan kobud hərəkətə əl atmasının da təsiri oldu. Martin Demiçelisin komandası 5:1 hesabıyla qalib gəlməklə startdakı məğlubiyyəti böyük ölçüdə unutdurdu.

Artıq ölkənin digər nəhəngi “Boka Xuniors” da LK-da ilk məğlubiyyətini alıb. Mariano Erronun çalışdırdığı komanda səfərdə “Sarmyento”dan xal ala bilmədi. İlk hissənin ortalarında Qabriel Diasın vurduğu qol ev sahiblərinə qələbə gətirdi. Amma “Boka” evə xalla yollana bilərdi. 88-ci dəqiqədə Benedettonun penaltidən yararlana bilməməsi “göy-sarılar”ın paytaxta əliboş qayıtmasını qaçılmaz etdi.
Ölkə çempionatının son mövsümünün gümüş mükafatçısı olan “Talyeres de Kordoba” LK-ya uğurlu başlayıb. Xavyer Qandolfinin komandası hesabat turunda da qalib gəldi. “Atletiko Urakan” üzərindəki 2:1 hesablı qələbə kordobalıların A qrupunda “Kolon” ilə birlikdə şərikli liderliyini təmin etdi.

B qrupunda da iki komanda iki tura maksimum nəticə göstərib. “Nyuellz Old Boyz” və “Sarmyento” şərikli liderlərdi. Qeyd edək ki, bu qrupda yarışan “Qodoy Krus” da xal itirməyib. Lakin mendosalılar LK-da bir oyun keçiriblər.

qrup mərhələsi, 2-ci tur
River Pleyt - Barrakas Sentral 5:1
Sepulveda, 37-öz qapısına. De la Krus, 48. Solari, 80; 90. Rondon, 85 – Sepulveda, 24.
Talyeres de Kordoba - Atletiko Urakan 2:1
Bustos, 41. X.Rodriges, 88 - Kokkaro, 43.
Kolon - Ximnasiya 2:0
X.Benites, 14. Qalvan, 27.
Nyuellz Old Boyz – Lanus 1:0
Lema, 6-öz qapısına.
Sarmyento - Boka Xuniors 1:0
Q.Dias, 23.
Arsenal - Arxentinos Xuniors 3:2
Broçero, 7. Tolosa, 71-p. Breytenbrux, 78 - Avalos, 1. Qondou, 32.
San Lorenso - Belqrano 2:2
Bareyro, 45+3-p.; 90+4 – Barinaqa, 55. Passerini, 61.
Estudiantes - Union 1:3
Kastilyo Manyoma, 44 – Moskuera, 49. Morales, 57; 64.
Tiqre - Rasinq 1:2
R.Roxas, 18 - Kintero, 6. Qalyeqo, 12.
Qodoy Krus - Sentral Kordoba 1:0
E.Lopes, 51.
İndependyente - Veles Sarsfild 2:1
M.Ximenes, 51; 90+5 – Kastro, 83.
Platense - Defensa y Xustisiya 0:0
Atletiko Tukuman - İnstituto 0:0
Banfild - Rosario Sentral 3:0
S.Sosa, 13. Alvares, 70. Sorayre, 82.
A qrupu
1. Talyeres de Kordoba 2 2 0 0 5-1 6
2. Kolon 2 2 0 0 3-0 6
3. İnstituto 2 1 1 0 1-0 4
4. River Pleyt 2 1 0 1 7-4 3
5. Atletiko Urakan 2 1 0 1 3-2 3
6. Banfild 2 1 0 1 3-2 3
7. Arxentinos Xuniors 2 1 0 1 5-5 3
8. Arsenal 2 1 0 1 3-3 3
9. İndependyente 2 1 0 1 2-2 3
10. Veles Sarsfild 2 1 0 1 2-2 3
11. Atletiko Tukuman 2 0 2 0 0-0 2
12. Rosario Sentral 2 0 1 1 0-3 1
13. Barrakas Sentral 2 0 0 2 1-6 0
14. Ximnasiya 2 0 0 2 0-5 0
B qrupu
1. Nyuellz Old Boyz 2 2 0 0 3-0 6
2. Sarmyento 2 2 0 0 3-0 6
3. Union 2 1 1 0 4-2 4
4. Belqrano 2 1 1 0 4-3 4
5. Rasinq 2 1 1 0 3-2 4
6. San Lorenso 2 1 1 0 3-2 4
7. Boka Xuniors 2 1 0 1 3-2 3
8. Qodoy Krus 1 1 0 0 1-0 3
9. Defensa y Xustisiya 1 0 1 0 0-0 1
10. Platense 2 0 1 1 1-3 1
11. Lanus 2 0 0 2 0-2 0
12. Estudiantes 2 0 0 2 2-5 0
13. Tiqre 2 0 0 2 1-4 0
14. Sentral Kordoba 2 0 0 2 0-3 0
Bombardirlər: Bareyro (San Lorenso), Qondou (Arxentinos Xuniors), Morales (Union), Passerini (Belqrano) - 3.