Son iki turda qələbəyə həsrət qalan “Qarabağ”ın aşkar autsayder “Kəpəz”lə dueli azarkeşlərin maraq dairəsində deyildi. Oyunu tribunadan bir ovuc adam izləyirdi.

“Football-plus.az” xəbər verir ki, oyunun qolla başladığını desək, yanılmarıq. Ağdamlılar elə ilk təhlükəli hücumda hesabı açdı. Elvinin sol cinahdan ötürməsini qəbul edən Benzya Kamranı məyus etdi. Qoldan sonra qonaqlar toparlanmağa çalışdı. Hətta 4-cü dəqiqədə Martins qola yaxın olsa da, zərbəsi dəqiq alınmadı. Bundan sonra ağdamlılar təzyiqi daha da artırdı. 13-cü dəqiqədə Toralın cərimə zərbəsindən qapıya göndərdiyi top tirə dəydi. Leandro geri dönən topu başla tora saldı. “Kəpəz”in müdafiəsi pərən-pərən olmuşdu. Meydan sahibləri çox rahat şəkildə “cəbhə”ni yara bilirdi. 16-cı dəqiqədə gəncəlilərin müdafiəsindəki çaşqınlıq Benzyanın dublunu rəsmiləşdirməsinə səbəb oldu. Oyunun axarı darmadağının reallaşacağına işarə idi. Lakin iki dəqiqə sonra “Kəpəz”in yeni transferi Niane hesab fərqini azaltdı. Burda gənc qolkiper Amin kobud səhvə yol verdi. Qol gəncəliləri ümidləndirmişdi ki, 21-ci dəqiqədə Leandro da dublunu rəsmiləşdirdi. Lakin VAR-dan gələn siqnaldan sonra Emin Əliyev qolu ləğv etdi. Hakim epizod zamanı Martinsə qarşı qaydanın pozulduğunu bildirdi. Matçda növbəti qol 37-ci dəqiqədə vuruldu. Görüşün ən yaxşısı olan Benzyanın ötürməsini Juninyo qüvvətli zərbə ilə qapıya göndərdi. Düşünmək olardı ki, ikinci hissədə daha qol vurulmayacaq. Lakin Benzya bu fikirdə deyildi. Yarımmüdafiəçi 43-cü dəqiqədə Toralın sağ cinahdan ötürməsini başla qapıya göndərdi. Beləliklə, “köhlən atlar” gəncəliləri meydana çıxmağa peşman etdi – 5:1.

Fasilədən sonra “Kəpəz”in nəsə edəcəyini düşünmək olardı. İlk 5 dəqiqədə Azər Məmmədovun komandası iki real qol imkanı əldə etdi. Lakin “Qarabağ” bundan artığına imkan vermədi. 52-ci dəqiqədə Elvin uzun reyd edərək qapı önünə ötürmə verdi. Leandro həyatının ən rahat qolunu vuraraq dublunu rəsmiləşdirdi. Bundan sonra gəncəlilər çökdülər. “Köhlən atlar” isə hücumları davam etdirirdi. 61-ci dəqiqədə meydana çıxan Nərimanın topa ilk toxunuşu qolla nəticələndi. Gənc forvard Benzyanın ideal ötürməsini dəyərləndirə bildi. 69-cu dəqiqədə Nəriman yenidən səhnəyə çıxdı. Onun ötürməsini Keyta qapıya göndərdi. Lakin VAR yenə hadisələrə müdaxilə etdi. Sən demə, qol vurulan zaman fransalı oyundankənar vəziyyətdəymiş. Son 20 dəqiqəsində komandalar vaxt öldürməklə məşğul idi. Beləliklə, ağdamlılar gəncəliləri meydana çıxmağına peşman etdi.

Gözdən qaçmadı
* Həm “Qarabağ”, həm də “Kəpəz” azarkeşləri ilk 10 dəqiqədə iki-üç dəfə yerlərini dəyişdilər.
* Hesab 3:1 olandan sonra gəncəli fanatlar “sarı-göy” formanın haqqını verin”, - deyə şüar səsləndirməyə başladı.
* Hesab 5:1 olan zaman “Kəpəz”in köməkçi məşqçilərindən Vasif Vəliyev əsəbi halda nəyəsə etiraz edirdi. Etibar İbrahimov onun qolundan tutaraq stadiondan kənarlaşdırdı.
* “Qarabağ” hesabı 7:1 edəndən sonra “Kəpəz”in baş məşqçisi Azər Məmmədov futbolçulara tapşırıq verməyi dayandırdı. Onu Etibar İbrahimov əvəzlədi.
* Oyundan sonra “Kəpəz” azarkeşləri futbolçuları yanlarına çağıraraq danlamağa başladı.

İLKİN SULTANLI