Çoxdan gözlənilən hadisə baş verib: “Şeffild Yunayted” baş məşqçi Pol Hekinqbottomu istefaya göndərib.

"Football-plus.az" xəbər verir ki, onunla birlikdə məşqçilər Stüart Makkal və Mark Hudson da komandanı tərk ediblər. 46 yaşlı Hekinqbottom “Şeffild Yunayted”i 2021-ci ilin noyabrından çalışdırırdı. Komanda onun rəhbərliyi altında 2022/23 mövsümündə 2-ci divizion sayılan çempionşipdən premyer-liqaya vəsiqə qazanıb. Qeyd edək ki, Hekinqbottom bu mövsüm yüksək liqada istefaya göndərilən ilk mütəxəssisdi.

Artıq onun xələfi müəyyənləşib. Komandanı çətin vəziyyətdən Kris Uaylder çıxarmağa çalışacaq. Onunla imzalanan müqavilənin müddəti 2025-ci ilin yayına qədərdi. “Şeffild Yunayted” ölkə çempionatında keçirdiyi ilk 14 oyunda yalnız 5 xal toplamaqla sonuncu yeri tutur.